Union Finance Minister Nirmala Sitharaman-i’n tun hnaia kum 2026-2027 budget a pharh takah, Chief Minister Lalduhoma’n Finance Commission 16-na rawt dan angin sorkar laipui chuan budget a pharh niin a sawi a. Hmarchhak state zinga horizontal devolution share pung state tlem tê zinga Mizoram a tel ve chu lawmawm a tih thu a sawi.
Social media account kaltlanga hemi chungchang a sawinaah chief minister chuan 16th Finance Commission recommendation angin sorkar laipui chuan kum 2026-27 budget a pharh ta a. Finance Commission 16-nain Mizoram an tlawh tuma Horizontal Devolution Criteria leh weightage atana an rawtna zaa 80 vel dawn chu an pawmsak tih a hmuh theih tih a sawi.
Chief minister chuan horizontal devolution-a Mizoram chan tur (share) hi 15th Finance Commission-ah zaa 0.5 a nih laiin Finance Commission 16-naah chuan zaa 0.564-ah an tisang tih sawiin, “Finance Commission 16-na hun chhung, Financial Year 2026-2031-a Mizoramin share of taxes a dawn tur chu a pung dawn tihna a ni. Mizoram chan tur zat pung hi a percent ang zawngin lang tam lo mah se, a sum hrawm a len avangin a sumfai ang chuan a tam tham viau ang,” tiin a tar lang.
Kum tina Mizoram sum hmuh tur hi a hma aiin Rs. vbc 1,500 velin a sang tawh zawk dawn tih sawiin chief minister chuan, “Finance Commission formula hmanga allocation siam scheme, SASCI leh a dangah te pawh kan chanpual hi a tam phah thei dawn a ni. North-East state zinga horizontal devolution share pung state tlem te zinga kan tel ve hi a lawmawm hle,” a ti.
Finance changtu ni bawk Lalduhoma chuan, “Village council leh local council nei kan nih avangin Rural Local Body Grant leh Urban Local Body Grant te hi an titawp mai ang tih kha kan hlau a. Kaltir chhunzawm zel turin kan ngen a. Kan ngenna ang takin hei pawh hi an awmtir zui ta zel a ni,” a ti bawk.
16th Finance Commission-in an rawtnate a pawmpui ngei theih nan an bawhzui nasa ve hle tih sawiin Lalduhoma chuan, “Mizoram an rawn tlawh tum pawh khan kan tang tlang hle a nih kha. Min rawn tlawh hnuah pawh khan Delhi lamah ka zuk meeting-pui leh nghe nghe a ni,” tia tar langin, an hnena an thehluh tak memorandum, fel fai leh zahawm tak buatsaihtu finance official-te chungah te, a bik takin Lalhmingmawia, MFAS, Addl. Secretary, Finance Department leh a team te hian an hahpui zual tiin, an chungah lawm tih a tar lang bawk.