Yumnam Khemchand Singh-a chu Manipur-a BJP Legislative Party chief atan thlan a ni a, an party-in sorkar an siamna kawng inhawng mek zelin Meitei leh Kuki-Zo inkara buaina chhuak avanga kum khat President’s Rule-a an awmna chu a tawp hnai.
Yumnam Khemchand-a hi politician hlun tak niin chanvo pawimawh tak tak a lo chelh tawh thin a. Sorkar laipui atanga an state-a ro an rel lai, N Biren Singh-a kaihhruai BJP sorkarah pawh khan minister a ni.
Kum 2017 leh 2022 Manipur legislative assembly inthlanah Singjamei bial atanga thlan tlin a ni a. MLA a nih hmasak hian assembly speaker a ni nghe nghe.
Kum 2022-a a tlin leh khan Biren-a sorkarah cabinet minister a ni ta a. municipal administration & housing development (MAHUD), rural development & panchayati raj leh education ministry a chang thin.
Minister hi February, 2025 thleng niin Manipur chu President’s Rule-a dah a ni zui ta a ni.
Yumnam Khemchand-a hi Thawhlehni zan khan New Delhi-a an party hmunpuiah BJP Legislature Party leader atan thlan a ni a. President’s Rule-a hmarchhak state a awm kum khat a tlin hma hretin he hmalakna hi kalpui a ni.
News agency ANI chuan sorkar siam turin BJP hian NDA-a an thawhpui party-te an dawr zui dawn niin a tar lang.
Tar lan tawh thin angin Manipur hi nikum February 13 khan President’s Rule-a dah tan niin August thla khan parliament rorel inkhawmah thla ruk dang pawh sei leh a ni a. Mipui thlan chhuah sorkarin ro rel rih lo mah se assembly erawh thiah a ni lo.
Hei vang hian sorkar din a nih leh pawhin kum 2022 inthlan atanga chhiar tanin kum 2027 thleng hun an la nei dawn tihna a ni.
MLA 60 awm theihna Manipur assembly-ah hian BJP hian anmahni pawha sorkar siam thei niin MLA 37 an nei a, an thawhpui lian ber, National People’s Party (NPP)-in pasarih an nei bawk.
Chief minister hlui, Biren-a chuan Pathianni khan NDA-a an thawhpuite pawh Delhi-ah thukhawm tura koh an ni tih a sawi a. “Chhanna duhawm tak dawn a beiseiawm,” tiin thuthar lakhawmtute hnenah a sawi.
Biran-a hi Kuki-Zo leh Meitei inkara buaina eng emaw chen a awm hnuah chief minister atangin a bâng a ni.
Union home ministry chuan December, 2025 khan Manipur-a chi leh chi inkara buaina chhuaka tharum thawhna thleng chhuitu commission chu an hun a pawh seisak a, report erawh ‘a hma thei ang ber, May 20, 2026’ aia tlai lovah thehlut turin a ti.
Manipur-a buaina hi court-in Scheduled Tribe-a Meitei telh tura thu a tihtluk duh lohna lantira Kuki-Zo kawng zawh atanga May 3, 2023-a chhuak a ni a. Mi 260 vel thi awm tawhin mi sang telin an himna zawngin an in leh lo an tlanchhiatsan a, an bungrua leh inte pawh an chân nasa hle a ni.