Aizawl: School Education Department-in thla tina a chhuah thin, Meichher Award 2025 chu School Education Directorate Conference Hall-ah an sem.
Meichher Award semna inkhawma khuallian, School Education Director Angela Zothanpuii chuan Meichher hi Mizo thu leh hlaa an article lar tak tak lo chhuahna a ni a, thuziaktute pawh mi chhuanawm tak tak an ni, a ti a. Thu leh hla hi mihringte vawngtu pawimawh a ni tih sawiin, thartharte hian lehkha ziak hlutna hi an hriat thar leh a ngai a, hnam pum leh department pawhin hma an lak nasat a ngai hle tih a sawi.
Meichher chanchinbu hi ‘ZORAM ÊNG’ tih hming vuahin, March/April, 1975 atang khan thlakip chhuakin chhuah tan a ni a. October, 1975 atang khan ‘MEICHHER’ tia a hming thlakin, vawiin thlengin chhuah a ni. Nikum khan kum 50 a tling a ni.
Meichher chanchinbua thu chhuahte zingah hian zirlaibua seng luh thuziak 22 a awm tawh a. Hengte hi School leh College a Mizo zirlai atan hman an lo ni tawh a ni.
Meichher Best Article of the Year 2025-ah pakhatna Rev Zosangliana Colney, Mission Veng, Aizawl a ni a, a thu ziah chu ‘Lal thar chibai i buk ang u’ tih a ni a, pahnihna chu Joseph L.Ralte, Chawnpui Veng niin, a thuziah chu ‘Hlawhtling tura beidawnna’ tih a ni. Pathumna chu Commissioner Lalkiamlova, Tuikual South, Aizawl a ni a, a thuziah chu ‘Vawk leh Mizote’ tih a ni.
Meichher Best Contributor of the Year-ah pakhatna JH Biakmawia Electric Veng, Aizawl, pahnihna Familia Laltansanga Fanai, Zotlang, Lunglei, pathumna Mahmuaka Chhakchhuak, Chanmari, Lunglei te an ni.