Aizawl: Aizawl North III bialtu MLA K Sapdanga, Home Minister chuan nimin khan a bial chhung, Aizawl Electric veng ZPM local council thar lawmna hun a hmanpui.
Electric veng MUP Run-a lawmna hun hmanah bialtu MLA K Sapdanga chuan, khawtlang hmasawnna nasa zawk a thlen theih beiseiin mi thar duhawm takin an zawm a, an hotu ni turin an lo pawm thlap a. Ani hi he khawtlang tana a tha lo tawh te kan thlirin thawhpui an chak a, an duhna te an tihhlawhtlin sak thei ta chu a lawmawm a tih thu a sawi a. Local council thar lawmna atan a rang thei ang berin Local Council House leh a hnuaia Anganwadi sak zawh an tum a, a chhunga furniture zawng zawng nen peih an tum dawn a, a bak chu Local Council thar te nen khawtlang hmasawnna an sawiho zel dawn tih a sawi.
K Sapdanga chuan veng hmasawnna a hmaa sak deuh tuk anga lang thin kha tunah chuan tluang purhin a kal theih a beisei tih sawiin, Local Council lam pawhin an theih tawp an chhuah ngei a beisei tlat tih a sawi a. AMC inthlan an hmachhawn dawn a, tunah hian thawhhona tha tak nen hma an la mek a, hnehna pawh an chan ngei a beiseiawm tih a sawi.
Aizawl North III bialtu MLA chuan, Kohhran leh YMA ten Electric Veng Parking buai thin chungchang hi an vei hle a, hei pawh hi anni ho nen a tihhlawhtlin dan kawng an zawng zel dawn a, Electric veng thler hrang hranga CCTV nei Welfare pawh camera changkang zawk ngaihtuahsak turin an inruahman mek a, kawtthler thim laia street light dah turin ruahmanna an siam mek tih a sawi.
Tunah hian Electric Veng Local Council-ah hian ZPM member pali leh Congress member pathum an awm mek a ni. Congress party ticket-a thlan tlin Samuel Vanlalpeka’n ZPM-ah membership fee pe-a a luh avangin ZPM Local Council hi a piang ta a ni.