Indian Air Force (IAF) hnena Lengpui Airport ram hralha inpuhna kal zelah Ningani khan political party pahnih – MNF leh MPCC-in hemi chungchang chhui chiang turin FIR an theh lut ve ve a, an theh luhna erawh a inang lo thung.

MNF party aiawhin MNF Legal Board Vice Chairman Lalpianfela Chawngthu-in IAF hnena ram hralh chungchang CBI chhuitir tura ngenna chu Chief Vigilance Officer, Khilli Ram Meena, Chief Secretary hnenah an theh lut a. Ngenna a theh luhah hian Lengpui ram hralh a nih dana dan bawhchhiatna thleng chi hrang hrangte a tar lang.

MNF general secretary ni bawk, Lalpianfela Chawngthu hian IAF hnena Lengpui ram hralh kawnga dan bawhchhiatna nasa tak thleng leh Rs vbc 188 vel zet tihchingpenna thleng chu Mizoram sorkar thunun theih loh CBI chhuitir ngei a tul tih a sawi.

Lalpianfela Chawngthu chuan, “Mizoram sorkarin December 28, 2023-ah Mizoram pum chu CBI thuneihna huam chhungah puang zuai mah se a hnu lawk, June 27, 2024-ah sut lehin central sorkar hnuaia thawkte chauh chhui phalsak an ni a, Mizoram sorkar hnuaia thawkte chhui thei tur chuan Mizoram sorkar phalna lak hmasak zel ngaia dah let leh a nih avangin, CBI chhuitir tura hma la nghal theitu chu Mizoram sorkar a ni a, Mizoram sorkar inkaihhruaina ding laiah vigilance dept. chu CBI hnena thubuai pe theitu a nih avangin chhuitir tura ngenna hi chief vigilance officer ni bawk, chief secretary hnenah thehluh a ni,” a ti.

Lalpianfela Chawngthu chuan ZPM Media Committee chairman hminga CBI-a FIR thehluh tumna awm nia sawi chu tlanchhe chunga mipui bum tumnaah puhin sorkar kalphung pangngai awm sa hmang ngam lova ruling party Media Committee chairman hminga FIR thehluh chu thil kalphung a ni lo va, CBI chhuitir tumna aiin politics thil taka hmai phih fai tumna mai a ni tih mi â nileng lo tan chuan a lang chiang nghal vek a, ZPM sorkar hian an lehkha theh luh hi bawhzuiin sorkar kalphung pangngai ngeia CBI kuta a hlan an beisei thu leh an um zui zel tur thu a sawi bawk.

“Dan dinglai palzutna langsar tak tak a tam bakah, ram lak hna chu a bul tanna, Preliminary Notification tihchhuah atanga ni 70 chhung lekin engkim zawh fel vek a ni a, hei hi dan zawm chung chuan thil theih loh tawp tura ngaih a ni,” Lalpianfela Chawngthu chuan a ti a; a buaipuitu, Aizawl DC Office leh sorkar hnathawk dangte chu dan kalha thil ti tur hian sorkar hotu leh mi thiltitheiten an nawr lui ngei nia a lan avangin Mizoram sorkar thunun theih loh tur CBI chhuitir a tul a, mipuiin sorkar kalphunga rinna an nghah zel theihna tur pawhin chhuitir chu a tul zual tih a sawi.

Mizoram Pradesh Congress Committee (MPCC) chuan IAF hnena Lengpui leh Sihphir ram hralh chungchanga thil dik lo awm nia langte chhuichhuah a nih theih nan CBI-ah FIR an theh lut a. Ram hralh chungchang chhui tura ngenna hi MPCC Action Committee Secretary Lalhmachhuana leh MPCC General Secretary C. Dothansanga hmingin CBI Aizawl Unit-ah an theh lut.

Ram lei chungchang hi CBI chhuitir ngei an phut bakah ZPM kaihhruai Mizoram sorkar chu an sawi ang ngeiin kumin February thla ral hma ngeiin CBI hnenah general consent pe turin an phut tih MPCC chuan an sawi bawk.

MPCC chuan February 4, 2026-a Council of Ministers meeting-in IAF-in Lengpui leh Sihphir ram an lak chungchang ngaihtuah hovin an sawiho zui nghal a, mipuiten thu dik an hriat theih nan hemi chungchangah hian CBI koh luh ni se an ti chu vanduaithlak hlea an hriat thu an sawi a. Sorkarin Anti-Corruption Branch-ah police chhuanawm tak tak a nei reng chungin anni ring zo lovin CBI koh luh a ngai an tihnaah hian home minister-in a enkawl home department chungah rinna an nghat zo lo em ni tih chu an zawhna a nih thu an sawi.

“Mizoram sorkar hian a duh a nih chuan ACB kaltlangin heng ram lei leh hralhna a sulsutu bera ngaih, Henry Lalremsanga Hlawnmual mantang eitute an awm a nih chuan a chhuichhuak thei a ni. Hetiang thil chhuichian ngai tihnuhnawh leh tur siin engvangin nge heng ramte hi hmanhmawh taka IAF-in an acquire theih tura hmanhmawh taka hma la nge an nih tih hi kan zawhna a ni,” an ti bawk.

ZPM pawhin CBI hnenah thlen tum

ZPM Party chuan Indian Air Force (IAF) ram lak chungchanga thudik hriat theih nana chhui chiang tura ngenna chu Zirtawpni hian CBI hnenah thlen an tum thu an sawi.

February ni 4, 2026 khan Chief Minister Lalduhoma kaihhruaiin Council of Minister meeting neih niin, COM meeting zawh veleh IAF in Lengpui leh Sihphir ram an lak tur chungchang ngaihtuahin an thufual zui a. Mipuiin thudik an hriat theih nan hemi chhuichiang tura ngenna chu Central Bureau of Investigation (CBI)-ah ZPM Media Committee Chairman B. Lalchhanzova, Minister hmingin February ni 6, 2026 hian theh luh an rel.

ZPM hotute chuan Zoram mipui ten hemi chungchanga thu chiang tak an hriat thuai tha an tih rualin, MPCC ten VUC chhui chian an lo ngiat ve ngawt mai chu thil kawngkal lo tak nia a lan thu an sawi a. A kawngkal dika CBI hnena direct-a chhui tura ngenna thehluh mai tur a nih laiin, a kual thei ang bera MNF ten Chief Vigilance Officer (CVO) chelhtu Mizoram Chief Secretary hnena ngenna thehluh an tum pawh chawlhsan mai tur leh, chak zawka investigation kalpui a nih theih nana kawng hmang dik thlapa CBI hnena direct-a FIR thehluh chu lo ngaichang mai tura an ngen thu an sawi.