Aizawl: Ni hnih awh tur Artificial Intelligence (AI) Pre-Summit chu nimin khan Indian Institute of Mass Communication (IIMC), Aizawlah tan a ni.
AI leh Media tih thupui hmanga AI Pre-Summit huaihawt hi India AI impact Summit 2026 lo awm tur atana India hmun hrang hranga a bultanna tura lo buatsaih hmasak a ni a. IIMC Aizawla buatsaih pawh hi IIT, Bombay leh sorkar laipuia Ministry of Electronics & Information Technology te nena buatsaih a ni.
He hunah hian IIMC Aizawla Regional Director mawhphurhna la mek tu, IIMC Aizawla Officer in Charge (OSD) Nampibou Marinmai, IIS chuan inlawmna thu sawiin, IIMC Aizawlin AI Pre-Summit a thleng thei chu lawmawm a tih thu a sawi a. He Summit hian ram hmasawnna tura AI hman tangkai dan leh chiang zawka hriat kawngah nasa taka a puih ngei a beisei thu a sawi.
AI Pre-Summit-ah hian Mizoram University Department of Mass Communication atangin Professor Irene Lalruatkimi, MZU IT Department atangin Associate Professor Dr. R. Chawngsangpuii, IIT Bombay-a Data Manager Nitish Singh, The Frontier Despatch Editor Adam Saprinsanga, Marketing Strategist Angela Roy, Tech Influencer Caleb Friesen leh IIMC Assistant Professor Dr. Jharna Brahma te’n Artificial Intelligence chungchang chu anmahni hna leh subject hawi zawngin kawng hrang hrangin an sawi.
Mizoram University leh pawn lam atangin zirlai, research scholar leh AI kaihhnawih company hrang hrang atangin mipui an kalkhawm a. Mithiamte leh kalkhawm mipuiin sawihona hun an hmang bawk.
AI Pre-Summit hi vawiin hian chhunzawm tur niin, Inrinniah Workshop buatsaih a ni ang.