Aizawl: Rajya Sabha MP K. Vanlalvena’n Indian Air Force hnena Lengpui ram hralh chungchanga thil dik lo awm nia lang chu Central Investigating Agency hmanga chhuichian a nih theih nan hma la turin President Droupadi Murmu leh Prime Minister Narendra Modi a ngen.
Inrinnia president leh prime minister hnena lehkha a theh luhah hian K. Vanlalvena chuan ram venhimna atana thil pawimawh Mizoram chhunga din chu Mizo mipuiten an pawm a. Chutih laiin mi hlemhle leh pamhamten dik lo taka sum siamna hmanrua atan Mizoram leilung hman tangkai an tum chu an rem ti lo tih sawiin, tuna IAF-in ram venhimna kawnga hmalakna atan Lengpui Airport bul leh Sihphira ram an lei danah Right to Fair Compensation & Transparency in Land Acquisition, Rehabilitation & Resettlement Act, 2013 bawhchhiaa man to uchuak takin ram an lei niin a lang tih a sawi.
He thilah hian dan anga tualchhung chanchinbua hriattirna tihchhuah te, mipui a nghawng dan tur zirchianna leh vantlang inrawnkhawm ang chi chu kal kânin sorkar sum Rs vbc 187.90 zet dik lo taka hman ni ngeia a lan avangin he thil dik lo lian tak ni-a lang hi Central Investigating Agency hmanga chhui chhuah a nih a, a mawhphurtute dan ang taka hrem an nih theih nan hmalakpui turin a ngen.
Rajya Sabha MP hian Zirtawpni kalta khan Union Home Minister Amit Shah hnenah IAF hnena Lengpui ram hralh chungchang thil dik lo awm ngeia langte chhui turin Central Investigating Agency-te thu pe turin ngenna lehkha a theh lut tawh bawk.