Indian Weightlifting Federation (IWLF) Youth, Junior leh Senior National Weightlifting Championships neih meka Isak Malsawmtluanga’n junior huangah bronze medal a lak hnuah Jeremy Lalrinnunga pawhin senior huangah bronze medal a la veleh.
Modinagar, Uttar Pradesh-a inelna neih mekah hian India ram pum huap pawha rit chawi chak hriat hlawh ber zinga mi, Jeremy-a hi senior huanga kg 65-ah inlanin Inrinni khan medal hi a hlawh chhuak a ni.
Kum 24 mi, Jeremy-a hian snatch-ah kg 133-a rit chawiin clean & jerk-ah kg 162 a chawi a, belhkawma kg 295 chawiin pathumna hi a ni a. Kg 302 chawi thei, Muthupandi Raja, Tamil Nadu leh kg 296 chawitu, Charu Pesi, SSCB chu a tluk phak lo a ni.
Ainawn Veng, Aizawl tlangval, Army Sports Institute (ASI), Pune, Maharashtra-a awm mek, Jeremy-a hi hun eng emaw chen inhliam vanga inelna tak taka ainlan theih loh hnuah a inlan ve leh thei ta a ni.
Yadav Farm House-a ram pum huap inelna kalpui mekah hian Ningani khan kg 239-a rit chawiin junior-a kg 60 huangah National Centre of Excellence (NCOE), Imphal, Manipur-a awm mek, Isak-a chuan bronze medal lo la tawh bawk.
Ram pum huap inelna hi Thawhlehni atanga tan niin Inrinni thleng a awh dawn a. Mizoram atang hian rit chawi chak pasarih leh anmahni hruaitu mi pahnih an kal a ni.
MIZORAM ATANGA KALTE:
1. Isak Malsawmtluanga, NCOE, Imphal – 60 kg Youth/Junior
2. Laithanpuia, MSSC, Aizawl – 65 kg Youth/Junior/Senior
3. Jeremy Lalrinnunga, ASI, Pune – 65 kg Senior
4. Lalhunthara, ASI, Pune – 71 kg Senior
5. Lalfakawma, MSSC, Aizawl – 79 kg Youth/Junior
6. David Lalzawmdika, NCOE, Imphal – 110 kg Junior
7. David Zohmingmawia, NCOE, Imphal + 94/+ 110 Youth/Junior
Coach: Minakshi, NCOE, Imphal
Manager: Lalchhanhima Parte, KIC, Champhai Ruantlang