Aizawl Municipal Corporation (AMC) inthlan a hnai tial tial a, campaign auhla hrang hrang hriat tur a awm chho nuk ta bawk. Thenkhat chuan thahnem ngaih luatah dawt sawi mai kan hreh lo chho leh mai ang tih a hlauhawm hle.
Party politics hi sakhua ang deuha kal kawi leh sahuai thingvawn bur awl tak mai a ni a, tupa in emaw thiam tak maia a sawi chuan kan awi nghal duai duai mai a. Lehlamin thiam takin an lo sawi leh a, kan thle leh dual mai thin bawk nen, patling fing awm tak taka ngaih pawh hi a lo bual a thei viau mai a. Pawm dan leh rin dan tawk thiam hi a lo ngai khawp mai.
Tuna kan campaign dan berah hi chuan insawisel leh insawimawiin kan che a ni ber a, party tinin manifesto tha tak tak an nei chho leh dawn a, chumi hmanga an hmalak tum dan sawi mai awm tak an nih laiin, lehlam pawl er leh hmer tel rana campaign kan la thulh lo niin a lang a, tihdan phungah kan nei tawh a nih ber hi maw!
AMC election ah hian MNF, Congress leh ZPM te chuan seat awm zawng zawngah chuh kim an tum niin a lang a, BJP in seat thenkhat chuh ve an tum bawk niin a lang. Heng party candidate-te atang hian kan mi duhzawng vote mai ila, kan tana tha tur leh kan milpui theih tur nia kan hriatah kan duhthlanna hmang mai ila, campaign nana midang sawichhiat vak vak ching thinte hi chu ngaia nei chungin, kan mi duhzawng chu i vote mai ang u.
Vawkpui pawh nise kan vote ang tia, mahni awmna party candidate apiang sahuai thing vawn tlatna rilru hi ramhlui zia a ni e.