Ningania East Jaintia Hills district, Meghalaya-a dan lova kalpui lungalhthei laih chhuahna khur puaka thi chu mi 27 an tling tawh a, Inrinni khan ruang dang pahnih hmuh belh leh an ni tih district thuneituten an sawi.
Thangkso-a rat-hole mining-a dynamite puak vanga thi hi a hmunah mi 24 an ni a, a hnuah damdawi ina enkawl laiin hliam tuar mi pathum an thi tawh bawk a. Chhanchhuah hna thawktute chuan khur chhung zim, a chung hniam tak, feet 100 vela thukah tang dang an la awm em tih an zawng mek zel.
A puah lai khan a chhungah hnathawk awm eng zat nge an hre chiang thei lo.
Inrinni khan East Jaintia Hills district thuneitute chuan magistrate zawng zawngte hnenah Thangkso-a dan lova thil laih chhuahna hmun dap chhuaka an lirthei, khawl leh hmanruate mansak turin a ti a; khur neitu, a enkawltu leh sum tumtu zawng zawng hriaa man turin a ti bawk.
Bharatiya Nagarik Suraksha Sanhita (BNSS) Section 163 hmangin dan lova siam thil laih chhuahna hmunah mi panga aia tam pun khawm khap a ni bawk.
Thupek hi Meghalaya High Court-in thu a pek anga chhuah a ni.
Justice (Retd) BP Katakey-a chu Meghalaya High Court chuan PIL lut a ngaihtuahna kal zelah kum 2022 atanga state chhunga dan lova lungalhthei laih chhuahna hmun thlithlai turin a ruat a. Meghalaya-ah hian, a bik takin East Jaintia Hills-ah hian hetianga thil laih chhuahna khur kalpui hi a tam hle a ni.
He PIL hi Ningani khan high court chuan ngaihtuah chhunzawmin district deputy commissioner leh SP chu February 9 thlengin dan lova lungalhthei khur siam awmte laka hma an lak dan kimchang thehlut tur leh tuna dinhmun mek hrilh turin a ti nghal.
Court hian Justice Katakey committee pawh January 17-ah report thehlut turin a ti a, committee hian East Jaintia Hills hi dan lova lungalhthei khur tamna ber a ni tih sawiin liantham takin an la kalpui reng niin a sawi bawk.
Committee hian January 14-ah pawh khan Thangkso-ah tho hian khur danga chhiatna thlengah mi pakhat a thi tawh bawk niin a sawi.