Aizawl: MPCC Secretary Rosiamngheta, AMC Corporator ni bawk chuan BJP party-in ram danpui atangin secularism paih tumin hma an la mek tih sawiin, secularism a nghing tan niin a sawi.
Thawhtanni khan MPCC chuan an pisa-ah Political Session hun an hmang a. He huna thusawitu Rosiamngheta chuan, tunah hian sakhaw zalenna hnuaia an awm avangin secularism hi an ngaihlu lo a ni maithei tih sawiin, “Secularism hi India ram dan puia a awm theih nan India rama church father ten hun rei tak chhung an nawr ngar ngar a, 42 Amendment-ah Congress-in constitution-ah a thun ta,” tiin, tunah hian secularism hi a nghing tan a, India ram constitution atanga paih tumin BJP ten hma an lak mek thu a sawi.
Tirhkoh Thoma kha AD 52-ah India a thleng a, a martar thu sawiin Rosiamngheta chuan, “India hi India tia hming vuah a nih hmain Kristianna a rawn lut tawh a ni. BJP hian India hi an intineitu em em a, Hindu leh Sindhu tih tawngkam hi Persia tawng a ni a, an tobul Mohenjodaro hi Pakistan-a awm a ni bawk. BJP hian keini kristiante hi foreign sakhua min ti tawh suh se. Hindu pawh foreign sakhua tho a ni,” a ti.
AMC Corporator chuan Congress chu a tha ber ni lo mah se, an innghahchhan chu kristianna a ni a, a tir atangin kristian ten India thatna turin hna an thawk ngar ngar zawk tih a sawi a. Mizo kristiante hian an hmakhua an ngaihtuah a ngai tak zet zet ta tih sawiin, “BJP-te hian Pu Gandhi-a hming pawh nawhreh tumin hma an la ngar ngar tawh a. An hotu thlak ve thin mah se, an ideology – Hindutva leh development hi an thlak ve ngai lo,” a ti a. Tunah hian Mizoram pawh an bei ngawrh dawn ta a, Mizorama hman turin Buddhist Circuit an rawn ti leh ta. Kum 2047 a India kum 100 lawmnaah Secularism paiha Hindu sakhua a India hnimphum vek an tum tih a sawi.