Aizawl: MSACS hnuaia hmalakna SPOT (Safe Place For Open Talk) chu nimin khan Health Minister Lalrinpuii’n MUP Building-ah a hawng.
SPOT hi MSACS, AIDS Healthcare Foundation (AHF) leh Aizawl Art Gallery te tangho buatsaih a ni a. A hawnna inkhawm hi MSACS Project Director, Dr. Jane Rinsangi Ralte-in a kaihruai.
SPOT buatsaih a nih chhan sawiin Dr Jane Ralte chuan, SPOT hi MSACS hmalakna pawimawh tak niin, thalaiten an vei zawng te zalen taka an sawi theihna atana buatsaih an nih thu te, district dangah pawh hawn belh zel an tum thute a sawi a. Thalaiten he hmun hi an buatsaih chhan ang taka an hman tangkai ngei a beisei thu a sawi bawk.
A hawnna inkhawmah Health Minister Lalrinpuii chuan, Mizorama HIV kai hmuhchhuah tawh zingah za zela 70 ten HIV an kaina chu invenna tel lova inpawlna hman atangin a ni a. Kum 20 leh 35 inkarah kai thar an tam hle tih a sawi a, India ramah HIV kai tamna state zinga mi an ni chu a pawi hle a, Kristian ram an nih angin an dinhmun chu a zahthlak hle a, tangruala HIV chu an do tlan zel a pawimawh tih a sawi.
SPOT hi thalaiten inthliarna leh inen hranna awm lova counselling, HV screening, HIV/AIDS laka inven dan a taka inzirtirna an dawn theihna hmun tha tak anga ngaih a ni a. SPOT hi hmun him tak, tunlaia thalaiten HIV/AIDS chungchanga harsatna an hmachhawn te, thuruk an sawi chhuah ngam lohte inhawng taka an sawina hmun tur atana ruahman a ni.
SPOT-ah hian Counsellors pahnih dah an ni a, anni hian HIV te, Sex Education te, Mental Health te leh drugs chungchanga harsatna nei te tan counselling an pe dawn a, zing dar 11 atanga tlai dar 5 thleng, sorkar office hawn ni mai bakah Inrinniah pawh hawn a ni dawn a ni.