Aizawl: Home Minister K Sapdanga’n ZPM sorkarin kuhva smuggling an khap zel dawn a, dan lova kuhva hralh kawnga inhnamhnawih an awm chuan an dim dawn lo tih Thawhtannia ZPM party chhung inkhawmah a sawi.
ZPM-in kuhva smuggling an do va, eptuten ZPM an do ve thung chu pawi a tih thu sawiin home minister chuan, “Politician inrawlhte mipuiin an hnawl a, police inrawlhte pawh an pension zel a ni. Kum hnih chhungin Hachhek bialin a rah an tel a, chu chu ram mipuiten kan hria a ni. Kan sorkar chuan kuhva smuggling hi kan khap zel dawn a, service lai an ni emaw, civil mi an ni emaw, inhnamhnawih an awm chuan kan dim dawn lo,” a ti.
Ruihhlo ngaite nasa zawka an buaipui a ngai tih sawiin home minister chuan, YMA kumpuan, ‘Ruihhlo do’ hi a fuhin a hun a dik tak zet a ni. Aizawlah ruihhlo ngai/ngawlvei an tam em em a, mi sing chuang zet an tling tawh a, zanah phei chuan hmeichhe tan mai ni lo, mipa tan pawh lenchhuah a him lo. Home leh excise department bakah YMA-te nena Operation Jeriko chak zawka kalpui tum a ni a, Hulhliap Short Stay, TBCC leh Operation Kingdom Ministry-te hi an hlu tak zet tih a sawi.
Kum 2021 atangin kum tin police boral za chuang an awm thin a, kum tin mi 150 vel bawr pension awm ziah bawk tih sawiin home minister chuan, “Post ruak 4,666 a awm ta mek a, tunah hian training mek 250 an awm a, financial year tharah police 200 lak leh tum a ni. A hmaa police kan lak dan ang bawk khan dik takin kan la leh dawn,” tia sawiin, thalaite lo inring turin a chah.
K Sapdanga chuan, “Kum 2025 kha police-te chuan fitness uar kumah an hmang a, kum 2026 hi discipline uar kumah an puang ve leh thung a. Police-ah chuan posting duhna hmun dil a awm ve lo va, a hun takah leh a hmun dik takah engkim tih vek tum a ni,” a ti bawk.