Kum 41 ni tawh mah se LeBron James chuan a la tar lo tih a lantir a, NBA regular season khelh mekah Pathianni tuk khan Los Angeles Lakers-in 105-99-in Golden State Warriors an hneh a, veteran player a langsar a, Luka Doncic awm lo mah se harsatna an tawk lo.
Crypto.com Arena-a inkhelah Lakers tan James-a’n a point a ngah ber a, a kum tam ve
deuh tawh mah se court chhungah a la tangkai a, player naupang zawk aiin a la langsar thei.
James hian point 20, assist 10 leh rebound vawi sarih a la a, triple double a siam teuh hle a. A inhliam hnua lo kir, Austin Reaves (16), Rui Hachimura (20), leh Marcus Smart (15) ten James an thlawp tha bawk.
Warriors tan Moses Moody (25), Gui Santos (15) Pat Spencer leh Brandin Podziemksi (14) te khel tha viau mah se Lakers hneh nan a tawk zo lo James leh a naute an ngam lo.
Veteran forward James hian a career-a regular season bikah point 43,000 a score tling teuh tawh hle a, point 95 chiah mamawh tawhin record a siam ngei a rinawm a. NBA la khel zingah amah hnaih bertu, Kevin Durant chuan point 32,000 a la score tling lo.
Warriors tan an thiampuipa, Stephen Curry a inlan lo a, American point guard hian a khupah hliam a tawrh avangin a inlan thei lo va. A tel lohna Warriors an dang a, chutihrualin inhliam vang thoin Doncic a inlan bik lo a, Warriors tan Curry awm lo hi chhuanlam a tling lo.