Chief Minister Lalduhoma chuan Sairang leh Silchar inkar rel service tharin sawhthing leh thlai dang tharchhuahte hralhna tur zau zawk a hawnsak dawn a, sorkar flagship scheme Bana Kaih a tichak dawn tih a sawi.
Thawhtanni khan Union Railway Minister Ashwini Vaishnaw chuan Gauhati atangin Sairang leh Silchar inkar rel service thar leh Gauhati Rel Station-a Blended Hospitality Service hawngin Sairang leh Silchar inkar rel service thar chu Chief Minister Lalduhoma nen an vai liam.
Sairang Rel Station-ah he mi puala inkhawm buatsaihah chief minister chuan Prime Minister Narendra Modi kaihhruaina hnuaia Act East hmalakna zarah Mizoram leh hmarchhak bialte chu ram hmasawnna lana hmun pawimawhah a chang chho mek a. Hmun kilkhawr zawka ngaih thinte chuan inkalpawhna tha zawk an nei chho mek a ni. Tuna an hawn thar Sairang leh Silchar rel service hi chung zinga pakhat a nih thu a sawi.
Sairang leh Silchar inkar rel service thar hian Assam nena inpawhna a titha lehzual dawn tih sawiin chief minister chuan, “Sawhthing leh thlai dang kan tharchhuahte hralhna tur zau zawk min hawnsak ang a, kan flagship scheme Bana Kaih hi a tichak dawn a ni,” a ti.
Chief minister chuan Sairang leh Silchar inkar rel tlantir tura a dilna an tihhlawhtlinsak avangin union railway minister chungah lawmthu a sawi a. “Silchar hi kan thenawm khawpui pakhat a ni satliah lo va, economic lama kan kawngpui pawimawh a nih avangin he rel service hi kan economy chuan a thatpui dawn a ni,” a ti bawk.
Thla nga liam ta khan Sairang Rel Station hi hawn a ni a, hawn a nih atanga hun reilo te chhungin a tihchangtlunna hna tam tak thawh a lo ni leh tawh a. Railways hmalakna hian fak a phu a, a bik takin NF Railway Lumding Division te chungah lawmthu a sawi.
Chief minister hian handholding scheme tichak leh zualtuah leh Mizoram lo neitute tan Sairang Station-a warehouse sak a tul thu te, Thenzawl Peace City thlenga rel kawng kalna tur tihfel thuai a tul thu te a sawi a. Delhi – Silchar Rajdhani Express chu Delhi – Sairang ni tura tihsei tul a tih thu a sawi bawk.
Hawnna inkhawmah hian Adviser to Chief Minister TBC Lalvenchhunga, MLA pawhin thu a sawi a. He hunah hian minister pahnih, Prof Lalnilawma leh B. Lalchhanzova bakah Jeje Lelpekhlua, MLA ten an tawiawm bawk.
Sairang leh Silchar inkar rel service thar hi chawlhkar khatah vawi nga a tlan thin dawn a ni.