Aizawl: Aizawl Hmathlir Pawl (AHP) chuan Aizawl Lei thlang hmun ruak chu tu pawl hnenah mah pe lo turin sorkar an ngen.
Aizawl khawpui chu hmun nuam leh chenna tlak a nih zel theihna atana hma latu pawl, AHP hian Thawhlehni khan Chief Minister Lalduhoma chu a pisaah an hmu a. Aizawl Lei thlang hmun ruak, lei tlahniam avanga Bible House pawh an thiah tawhna lai chu Mizoram sorkarah pawl thenkhatin office atan an dil tih hriat a ni tih thlenin helai hmun hi Kulikawn leh Chanmari inkara kawngpui sira hmun inhawng (open space) kan neih awmchhun ni tawh, taksa sawizawi duhte leh khawthlir duhte tana hmun nuam leh remchang a ni tih an sawi.
Hei bakah hian mi thahnemngai thianho pawl chuan tlaizawng kung 19, herhse leh phunchawng kung eng emaw zat an phun tawhna a ni a, a lo puitlin hunah chuan Aizawl timawitu tur a nih bakah boruak thianghlim pe chhuak tur a la nih dawn avangin sorkarin tu kutah mah pe lo se, tuna a awm ang hian humhalh tlat nise tiin an thlen a ni.
An rawtna thlen hi chief minister pawhin a duhpui ngei nia an hriat thu AHP hruaitute chuan an sawi.
AHP hian chief minister hnenah Aizawl khawpui chhehvela ramsa lo pung mek humhalh a tul thu pawh an thlen bawk.