Liverpool coach Arne Slot chu Mohammed Salah-a laka Manchester City defender thar, Marc Guehi-a chet dan referee-in a hrem lo leh a hnawt chhuak lo chu a lawm lo hle.
Nipui lai khan Guehi hian Liverpool a zawm teuh viau a; mahse, Crystal Palace-in a chhuah an phal loh leh tak thut avangin an chang ta lo va. Thlasik bazar liam taah khan Selhurst Park chhuahsanin City a zawm a, Pathianni zana Anfield-a a len luh hmasak berah Reds tantuten an au el nasa hle a, 3-1 laiin a team thar hi a chak hawpui bawk.
Liverpool fan-te lawm lohna belhchhah turin Guehi a khel tha a; mahse, Salah laka a foul red card a hmu lo chu a vannei a tih theih a, Reds coach Slot pawhin, “Mo Salah khan keeper chauh a hmachhawn tawh a, Anfield-a tun hnai kum sarih emaw, kum riat emaw kal thin chuan an hre vek ang – Mo khan khatiang chance kha a la khung ziah! Mahse, referee khan kan tana tha lo turin thutlukna a siam a, an hna hi tha takin thawk rawh se,” a ti hmiah mai.
Dutch coach chuan inkhel chungchang thlir zuiin, “Thil thleng tam tak a awm a, kan chak zo ta lo erawh pawi ka ti hle. First half-ah khan City-in inkhel an thunun a; mahse, goal an khung thei bik lo. Second half-ah hma kan sawn a, 1-0 a hma hruaiin kan tisual mawh hle a; mahse, a hnuah 1-1 a ni a, Silva khan a titha em a ni. Extra time-a goal chhuah kan ching ta hle a, kan ngai neih lek lek chu a nih hi,” a ti a, result-ah a lawm lo.