Labour, Employment, Skill Development & Entrepreneurship (LESDE) Department buatsaih, February 10-14 chhung awh tur, ‘LESDE Kût 2026’ chu Thawhlehni khan Aizawl Lammualah Mizoram Larsap General (Dr) Vijay Kumar Singh chuan khuallian niin a hawng.
Larsap hian Mizoram Building & Other Construction Workers Welfare Board (MBOCWWB) hnuaia project kalpui tur, ‘Eizawnna Kailawn’ leh ‘Rahbi Chhertu’ a tlangzarh bawk.
Gen. (Dr) Singh chuan sum lei pai hmasawnna chu eizawnna thar siam chhuah zatah te, thalai chher chhuah leh entrepreneur chawikan tamah te, hmeichhia leh thingtlang mite tel tam lamah te a innghah thu a sawi a. Micro, Small & Medium Enterprises (MSME) sector chu ram thanna atana pawimawh tak a nih thu sawiin, India ram chu MSME sector-ah khawvel hriat hlawh leh thang chak berte zinga mi a nih thu leh ‘ram dangte entawn leh zir chian châk a nih thu a sawi a. MSME hmalakna chu thingtlang kilkhawr thleng phaka kalpui a tul thu a sawi.
Larsap chuan Mizoram chu hnam ziarang hausa tak, kutthemthiam, kuthnathawh lama theihna nei leh thil siam chhuahna kawnga theihna sang tak nei a nih thu sawiin theihna hai chhuak tura tan lak a tul thu a sawi a. Tunlai thiamna behchhan khawvel sum leh pai dinhmun thang chak tak karah thiamnate tihpun ve zel a tul thu a sawi a. Sorkar hotute chu entrepreneur chawikan phute theihtawp chhuaha pui tur leh sorkar laipui scheme hrang hrangte mipuite zirtira a hlawhtlin ngei theih nana tanlak a tul tih a sawi.
Khualzahawm, LESDE Minister Lalnghinglova Hmar chuan an department chu mite ni tin khawsak leh eizawnna nena a innghen tlat thu sawiin, Mizo thalaiten eizawnna ngelnghet an neih theih nana puih, bana kaih leh zawrh ngam thiamna neihtir an ngai pawimawh tih a sawi a. LESDE Kût kaltlangin office dawr tura hmun hran hran kal ngai lova hmun khata dawr theih tura ruahmanna siam a nih thu sawiin thalai hna zawng lai leh la zawng turte huikhawma fuih phur turin he kût hi siam a nih thu a sawi a. Eizawnna Kailawn leh Rahbi Chhertu project-te chuan rahbi thar siamin, Mizote eizawnna a siamsak dawn tih a sawi.
He hunah hian Dr. Lalhriatzuali Ralte, Secretary, LESDE Department leh Director John Tanpuia bakah T. Thangropianga, Jt. Director, LESDE Department-ten thu an sawi bawk a. Larsap-in stall hrang hrang 168-te tlawh kualin a nghaktute a kawm bawk.