Manipur-a Ukhrul district-ah mi tu tih hriat loh ralthuam nena cheten Thawhtanni chawhnua Litan Sareikhong khuaah in hal lehin boruak a tang thar zual hle tih thuneituten an sawi.
Ralthuam kengte hian tlangram khuaah hian van lam hawiin silai pawh an hmet puak a, khaw mite chu an thil neihte nen tlanchiain an thenawm, Kangpokpi district-a hmun him lam an pan.
Tangkhul thingtlang khaw mi eng emaw zat pawhin an chenna in an chhuahsan bawk nia sawi a ni.
Buaina hi Inrinni zan atang chhuak kha niin Tangkhul Naga hnam pakhat chu Litan-ah hian mi pasarih/pariat velin an sawisak atangin a ni.
Kut tuar zawk chhungkuate hian Litan Sareikhong khaw lal thu angin an hnam tih dan anga buaina chin sawi fel turin an ti a, Pathianni tlai kha hnam hnih aiawhte inbiak hun atana ruah ni mah se inbiak a ni thei ta lo a ni.
Inbe lo hian a bul lawka Sikibung khuaa mi nia hriatten Litan Sareikhong lal in hi an bei zawk niin an sawi a. Khua an chhuahsan hma hian silai pawh vawi eng emaw zat an kap niin an sawi bawk.
Pathianni zan khan khaw chhungah hian tribal hnam hnih chu nasa takin lungin an intawng zui a, thuneituten khuahkhirna an kalpui phah.
Thawhtanni zan lai vel khan Litan Sareikhong-a Tangkhul Naga in eng emaw zat hal a ni a, Kuki helho tihah puh a ni.
A bul lawka Kuki in tlem azawng pawh a kang bawk niin thuneitute chuan an sawi.
Tangkhul hi Manipur-a Naga tribe cheng tam ber an ni.
Hetiang thil a thlen avang hian state minister Govindas Konthoujam-a chuan a tlawh a. “A hmunah chuan boruak a tang hle a. Deputy Chief Minister L Dikho-a pawhin khaw mite hi a kawm a. A hnu lawkah in a kang zui leh a. Thawhtanni tlai dar 05:00 thleng khan in 17 a kang a, a vaiin in 21 a kang tawh a ni,” tiin thuthar lakhawmtute hnenah a sawi.
“Tharum thawhna a thlen zel avangin venhim hna thawktu tur tam zawk tirh an ni,” a ti.
A hmain Deputy Chief Minster Dikho-a kaihhruaiin Tangkhul Naga khawthlang aiawh pawl leh Kuki MLA te chu Litan-ah hian an thukhawm a. “Hetah hian Tangkhul Naga Long leh Tangkhul Shanao Long aiawhte bakah Assam Rifles officer, Ukhrul MLA, state sorkar mi pawimawh leh Kuki aiawhte an tel,” tih sorkar hotu pakhatin a sawi.
Tangkhul leh Kuki intihbuaina chhuahna hmunte pawh Dikho-a hian a tlawh a, Naga leh Kuki khaw hotute pawh a kawm.
Tharum thawhna chu titawpa muanna a awm theih nana hma la turin a ti a. “Kan inkawmna hi a hlawkin a tha hle a. Tute pawhin muanna an duh a, an inrem lohna hi tihfel thuai a harsa a; mahse, tharum thawhna hi chu tihtawp vat tur a ni,” a ti.
Dikho-a hian buaina chhuak chu mi tute emaw tlemin an chawh chhuah a nih thu leh hnam leh hnam intihbuainaa chantir loh a tul thu a sawi bawk.
“Venhim hna thawktute an awm reng a, an mamawh tawk dah a ni a. Muanna a awm theih nan kan theihtawp kan chhuah a ni,” a ti.
Venhim hna thawktute hian boruak thunun tumin kein an patrol a, hmun pawimawh zualah duty an indah reng bawk.
Chief Minister Y Khemchand Singh-a pawhin hnam hnihte chu an intihthinrimna dah bova muanna vawng turin a ngen thu social media-ah a tar lang.
“RIMS Hospital-ah tukin (Thawhtanni) khan Litan, Ukhrul district-a buaina chhuaka hliam tuarte ka tlawh a, an mamawh ang enkawlna pek niin an dam chhuah leh thuai ka duhsak a ni,” ati bawk.