Aizawl: Mizoram Pradesh Congress Commiittee (MPCC) chuan nimin khan thuchhuah siamin, tun hnaiah kawlphetha chhit man (electric bill) a pung nasa tih sawiin, ZPM sorkarin mipui rawka sorkar sum tuakna atan electric bill tisang vakah puhin bill siam tha leh turin sorkar an hriattir.
An thuchhuahah MPCC chuan, Mizoram hmun hrang hrang atanga report an dawn danin electric bill man a pung nasa hle a. Thla khata Rs 600 thin ten tunah chuan Rs 7,000 bawr velte chawiin, Rs 1,000 pawh chawi tling ngai loten cheng sing chuangte an chawi chu pawi an tiin a ngai thu tak hle tih an sawi.
MPCC chuan ZPM ten an manifesto-ah electric bill an tihsan ve loh tur thu a ziah bakah, January 12, 2026-a ZPM Office hawnna inkhawmah Chief Minister Lalduhoma’n kum tinin electric bill hi a pung thin a. Sorkar liam taah unit khat man chu Rs 5.83 a ni a. Hei hi kan chhawm a. Kum nga chhungin keini chuan electric bill hi kan tipung ve dawn lo a ni, tiin a sawi a. Tunah hian mipui rawka sorkar sum tuakna atan electric bill chu ZPM sorkarin a tisang ta vak maiah puhin, pawi an tih thu an sawi a. An intiamna ang leh CM Lalduhoma sawi ang ngeiin Unit khata Rs 5.83 a bill siam tha leh turin ZPM sorkar a hriattir tih an sawi.
MPCC chuan electric chhit man sang chak lutuk hi a tul angin an zir chiang dawn tih sawiin, an ngenna leh hriattirna ngaipawimawh lova ZPM sorkarin electric bill a tisang lui a nih chuan mipuite thlavang hauh turin a tawp thlengin an che chhuak dawn tih an sawi bawk.