February 14, 2026 hian Aizawl International Half Marathon (AIHM) chu a tum hnihna atan buatsaih a ni dawn a. Hemi puala siam t-shirt chu nimin khan Home Minister K Sapdanga’n a tlangzarh a. Khawvelin marathon a hlut tih a sawi.
MINECO-a a pisa-a T-shirt a tlangzarh inkhawmah home minister chuan marathon chu khawvelin a hlut a. A hlutna chu intihsiakna ni mai lo va, hriselna leh fitness atan a pawimawh tih a sawi a. Taksa bakah rilru hriselna, mahni inrintawkna leh nunphung piah lamah, khawtlanga nunhona atan hian a pawimawh a, chu chu khawvelin a hlut chhan a ni tih a sawi.
K Sapdanga chuan infiamna hmanga hriselna tihhmasawnna a pawimawh tih a sawi a. Khawvelin fitness a uar telh telh tih sawiin khawvelin hriselna a ngaih pawimawh chhoh mekah khawvel huap inelna sports department-in an buatsaih chu lawmawm a tih thu a sawi.
Police department-in nikum kha fitness kumah puangin kuminah pawh an chhunzawm zel tih sawiin home minister chuan, tun tum AIHM-ah pawh hian police 150 an tel dawn tih a sawi bawk.
AIHM curator Innovation India CEO Captain Rahul Bali pawhin thu sawiin tun tumah hian Kenya, Ethiopia, Bahrain bakah, France leh England atangin AIHM-ah an tel dawn tih a sawi a. International runner 20 chuangten an telh theih tur an tichiang tawh a, visa pawh an nei tawh. Foreigner tan Mizoram lut tura Protected Area Permit (PAP) a ngaih avangin India an thlen ve leh buaipui a ni ang a, an neih theih ngei pawh an beisei tih a sawi.
AIHM-a tel tumte tan online registration hi Nilaini tlai dar 6 thleng chauh a tih theih dawn a, offline registration erawh February 12 leh 13-ah Lammual-ah tih theih a ni ang a, junior leh senior category hi offline chauh a tih theih a ni.