Aizawl: Assam Rifles ram chhuahsan hman dan tur ngaihtuah tura din, pawl hrang hrang aiawh advisory committee-in a rel angin, AR ram chhuahsanah Vana Pa Hall sak a ni dawn a, Hari Mandir pawh sawn a ni dawm.
Advisory committee chu an chairman, Lalduhoma, Chief Minister hovin CM Conference Hall-ah Nilaini khan a tum nga nan an thukhawm a. An rel dan chuan Canteen kuala Hari Mandir sawn nan Loch House leh CHAN Office inkarah ram pek a ni dawn a, Loch House chu a lan dan tidanglam lova chei that an rel a, Vana Pa Hall chu a upat tawh avangin AR insawn hma khan sorkarin sak that a tum thu lo puang tawh mah se, AR an insawn takah chuan lian zawk leh changkang zawk sakna tur hmunhma a awm tak avangin Convention Centre sak an lo pawm fel tawh chu Vana Pa Hall hming puttir an rel a. Tuna Vana Pa Hall hi chu sorkarin a hmanna tur a ngaihtuah dawn a ni.
Chief Minister Lalduhoma’n Khatlaa AR ram mawng lam, MINECO bulhnai hi Chief Minister Residence leh CM Office sak nan a dil thin a. CM Office leh Secretariat Building inhlat taka a awm hian sorkar meeting leh programme tam tak hi a kal tluang lo fo va. Hun, tha leh sum sen a sang bawk a. MINECO-a CM hmunhma sawn hi heng harsatna pumpelhna tha bera ngaih a ni a. Khatlaa AR ram joint survey chuan ram chuang (surplus) hi hectare khat chuang hlek a awm tih a lo hmuchhuak tawh a. February 2, 2026-a chief minister leh Lt. Gen Vikas Lakhera, DG, AR te inkawmnaah Khatlaa AR ram thenkhat, Tuikual ep ram, MINECO Main Entrance ep atanga awlsam taka pawh phei theih chu sorkar hnena an hlan theih tur thu chief minister a hrilh a, bawhzui mek a ni.
Aizawl laili laia War Memorial pahnih, Canteen kual leh Treasury Square-a mite hi AR-ten Khatlaa an ram chhunga sawn tum a ni a. AR chhuahsan ram china kawngpui tihzauh leh siam thatna tur sum sanction hi tun hnaiah hmuh a ni a. PWD lamten hna an tan thei thuai dawn niin an sawi.
Thutkhawmah hian November 18, 2025 a an thutkhawm vawi linaa an rel tawh, ‘AR ram chhuahsan hmunhma leh building hman dilna lam reng reng committee-ah chhawpchhuah tawh loh ni se’ tih chu kenkawh zel tur niin an sawi bawk.
Thutkhawmah hian Home Minister K. Sapdanga, Revenue Minister B. Lalchhanzova, Sports Minister Lalnghinglova Hmar bakah Advisory member dangte an tel a ni.