Dan lova tawlhruk sava bo man a nih thu kan hre ta zeuh zeuh a, mahse an man hnu lawkah an bo thu kan hre zui leh mai thin. Hei hi a mak ngawt mai!
Dan lova ramsa leh sava tawlh hi dan kalh a ni a, a hremna pawh a nep lo viau. Nungcha leh ramsa chi hrang hrang dan lova tawlh thawm hriat tur hi a awm leh nawk thin a, thenkhat phei chu vang deuh deuh, hralh suma chantir a nih hnua man to tak tak an ni hlawm.
Kan ram paltlanga man tawk ta thenkhatte pawh hi a man a to hlawm viau nia sawi a ni a, mahse man an nih hnu lawkah an dahna hmun atangin a bo leh nghal mai thin lai hi a mak zawk hle.
Sorkar hian engahmah a ngai lem lo nite pawh hian a lang a, vawiin thlengin chhuichhuah an la ni hlawm lo a, a titu tur awm ang thlengin rinhlelh pawh an nei lem lo niin a lang.
Mipui hriat loh hian sum siam nan an lo hmang zawk nge tih lah hriat a ni lo a, heti lam changtu minister a ni emaw, thuneitute dangte hnen atang pawhin thuthar hriattir kan ni ngai lo bawk.
Sorkar hian man chauh hi intihtheih nan a hmang nge, chhuichhuah tak tak a tum lem lo tih chu zawhna awm thei tak a ni.
Heti reng hi kan nih chuan sava a ni emaw, nungcha dang tawlhrukna kawng kan ni zual sauh ang tih a hlauhawm a, kan lo ni reng tawh thei bawk. Sorkar hian mit an lo siai pawh a ni ve reng thei bawk asin.