- Dr. C. Lalrampana
Mihringte hian kan hring nunah hian engemaw chin dawk lak, Chin than, kan tih lohva kim lo riauva inhriatna kan nei thin. Chungte chu a tha zawng emaw, a tha lo zawng emaw pawh a ni thei. Tin, mahni tan chauhva pawi a awm rualin, a then chu midangte tana pawi leh hnawksak pawh a ni thei bawk. Mithiamte chhut danin heng chin dawklak [addiction] kan neihte hi mihringin a lo pian chhuah phat atangin a nei nghal niin an sawi. Chutiang zelin thilnung leh nungcha tinrengte pawh an ni.
Aristotle-a ngaihdan chuan chin dawklak [addiction] hi “akrasia” (ἀκρασία) tih a awm a, chu chu “invenhim lohna” emaw “thil tih sual” tihna a ni.” a ti. A sawi zel danin- “thlarau lam chakna chu a awm” tiin a zirtir a, Chin dawklak [Addiction] chungchanga a ngaihdan chu “thil tih sual chu mawhphurhna nei a ni” tiin a zirtir. Inzirna chu a pawimawh hle tih a zirtir, thil tih sual laka himna turin beih a ngai a ni. Addiction chungchangah hian Thorndike-a ngaihdan chuan “law of effect” a awm a, chu chu “thil tih hnuah a rah a awm” tihna a ni. “Thil tih thatna a awm chuan thil tih thatna a pung ang, thil tih sual a awm chuan thil tih sual a pung ang” a ti.
Thorndike-a ngaihdana addiction chu “thil tih that lohna a ni” tiin a hrilhfiah a, thil tih sual a awm chuan thil tih sual a pung ang.” a ti. Thorndike-a ngaihdan chuan- “thunun theihna chu chin dawklak [addiction] atanga himna turin a pawimawh hle” tiin a zirtir bawk.
Chin dawklak (habit) chi hrang hrang tam tak a awm a, chungte chu tawite tein tarlang ila eng chin dawklakah nge mutan i neih ve lo inchik chhin ang che. Chung chin dawklak chihrang hrangte chu:
Substance addiction: Ruihhlo avanga thlahlelhna, damdawi emaw zu emaw thlakhlelhna hi a ni. Heng thlakhlelhnate hi tih loh avanga kim lo tlata inhriatna leh chãk tlatna lo awm thinte hi Substance addiction chu a ni a, chung zingah chuan hengte hi an tel:
Opioid addiction
Alcohol addiction
Nicotine addiction
Cocaine addiction
Khing zingah khian a engamah khi chin dawk lak tha a awm lova, a zavai khian kan ram leh hnam timualphotu, mimal, chhungkua, khawtlang, kohhran, sakhua tibuaitu leh kalkhamtu a ni. A bik takin no 1 & 2, 4 khian min tihming hliau zual a, kan thalaite nunna suat tamtu ber pawh a ni. No 3 pawh khi panchhia, ngâwt [cancer] thlen tam bertu a ni bawk. Chuvangin, Substance addiction lakah hian i tang ve mek em? Eng ber khi nge i tanna chu nangmah ngei i inhria a, chuvangin, a lak atanga chhuak vat turin tan i lak a ngai a ni. A engamah khi chin dawklak tha rêng rêng a awm lo tih kan hriat a pawimawh hle.
Behavioral addiction: Thil tih than leh chin than, chin dawklak avanga thlakhlelhna, thil tih chãkna; tih ngei ngei tura ngaih tlatna hring nunah hian a awm thei bawk a, chung chu behavioural addiction chu a ni. He thilah hian Mizorama chhungkhat nu leh pate pawh an tang nasa hle. Chungte chu:
Gambling addiction
Internet addiction
Social media addiction
Video game addiction
No 1,2,3-ah khian eng berah khian nge i tân mek le? No 3naa tang khi kan tam zual em? Nge no 4-ah zawk khian? Substance addiction-ah fihlim mah la, behavioural addiction-ah khian i tan tlat chuan a tha chuang lova, engmah a lêm chuang lo, sim tur i nei ve tho tihna a nih chu? No 1-a tang tawh thin tam takte avangin chhungkaw keh chhiatna leh tlakranna a thleng nasa hle thin. Tun thleng pawhin harsatna thlentu a la ni cheu bawk.. No 2,3,4 pawh khian kan nunphung a khawih buai nasa hle. Addict kher lovin awm thei ila chuan No 2&3 khi chu a thain a tangkai hle. Mahse, addict chinah hi chuan engmah hi a tha tawh thin lo. Chuvangin, nangmah ngei kha lo inenfiah rawh le.
Process addiction: Thil tih, chin dan dawk lak thalo thlakhlelhna chihrang hrang zingah process addiction hi sim harsa pawl tak a ni ngei ang. No 1 & 3 phei khi chu sim harsa tak a ni. Sex addiction hian min tibuai lehzual hle. Kawppui nupui-pasal pawmlai nei reng chunga hmangaih dang nei, sex addiction-a buai tlat te, pastor, kohhran upa leh thalai hruaitu, a hmei apain sex addiction hian kan ram pumpui hi a chawk buai nasa hle. Sex worker lah duhthusamin an tam phah a, HIV+ vei an tam êm êm a, hmingthanna tha lo ber kan khum mek a ni.
Sex addiction
Food addiction
Shopping addiction
No 2 Food addiction pawh kan vei tho. Thil ei hun leh hun lo pawh sawi lova mahni chin dana thil ei ngei ngei tum tlatte hi a tha lo hle bawk. No 3 phei khi chu chhungkaw tlakranna thlentu a nileh zual âwm e. Thil mamawh leh tul ni lem lo, lei chakna leh lei ngei ngei tula hriatna online shopping, marketing lamah chhung tinte kan tlan nasa hle. Hei hi kan ei bar dinhmun [economy] tichhetu a ni mek. Chuvangin, I tanna ata chhuak turin tan i lak a ngai ang. Shopping addiction hian chhungtin a chawk buai mek. Chhungkaw mamawh miah loh thil pawh lei chak hrim hrimna thlarau chin dawklak tha lo tak nei an tam hle. Chuvangin, sim hmak tura beih chu kan tih makmawh a ni.
Substance-induced addiction: Ruihhlo avanga thlakhlelhna, ruihhlo chãk avanga thlakhlelhna. Prescription medication addiction, Illicit drug addiction tihte pawh sawi tur tam tak a la awm thei.
Cross-addiction: Thlakhlelhna chi hrang hrang, thil tih chakna chihrang hrangte a awm. He chin dawklah phei hi chuan mi a hneh thei hle. Tunlai thalaite thinlunga khat liam, an thinlung, ngaihtuahna leh rilru chenchilh tlattu a ni.Hengtiangin tarlang ila:
Ruihhlo avanga thlakhlelhna (Addictive habits): Ruihhlo chi hrang hrang, damdawi emaw zu emaw thlakhlelh tlatna. Tih loh chuan thi dawna inhriat tlatna leh awm hle hle theih lohnate an nei thin.
Compulsive habits: Thil tih dan thunun theih loh, thil tih chak tlatna.
Ei dawklak [Eating habits]: Thil ei dan, thil ei châk tlatna.
Exercise habit: Taksa sawizawi dan, taksa sawizawi châk tlatna.
Thluak sawizawi (Mental habits): Ngaihtuah dan, rilru sawizawi dan.
Social habits: Mi dangte nena inlaichinna, inpawl chãk tlatna chin dawklak.
Productivity habits: Thil tih dan, hun hman dan, thil tih chakna.
Financial habits: Sum enkawl dan, sum hman dan, sum khawih chak tlatna chin dawklak.
Sleep habits : Mut hahchawl dan, mut hahchawl chakna. He chin dawklak phei hi chuan min chim hnèh hle. Zing dar 6 hmalama tho thin thaĺai leh nuvalai-Pavalai an vang tawh hle.
Hygiene habits: Taksa fai dan, inbual fai dan chin dawklak a awm bawk. Chimlim leh lutuk, a lova luata kalpui pawh an awm nual, chin tawk hriat a ngai hle.
A tawp berah chuan eng thil pawh hi chin dawklak a awm thei a, mahse, thil tha leh tha lo erawh thliar hran thiam a pawimawh hle. Mizorama kristiante zingah bik phei chuan chhungkua leh midang ngaihsak lék lova Pathian rawngbawl lova hruaitu nihna âtchilh leh kohhran rawngbawl, sum leh pai rohlu ringawt âtchilh, sex ringawt âtchilh, ruihhlo, Smuggling, sum thianghlim lo âtchilh, duham leh verther, phakar ãtchilh ching dawklak an tam hle. Hetih lai hian kan nunah entawn tur a vang hle lawi si a, chuvang chuan kan chheh vela hnamdangte leh milembia kan tihte hian keimahniah entawn tur leh zirtur an hmu bik lova, kan zahawmna kan hloh mek a ni. Chuvangin, khing chin dawklak tha lo zingah khian eng khi nge i mutan tih lo inenfiah rawh le.