- Lalremliana Pachuau
‘Mizo mistiri ka chhawr duh lo’ tih thu pui hmanga ka article ziah kan lo dawnsawn dan atangin, Mizo kut hna thawktute zingah work culture leh work ethics kan tih mai hre chiang tâwk lo, kan ei zawnna kawngah kan Professional lohna a lo lang chiang hlein ka hria.
Ei zawnna ti bahlah leh ti sukuk zawnga Mizo tlawmngaihna chhawm nun tlat la tumna te, kan ei zawnnain a tawrh theihna tur zawnga chhiat ni that ni lo chhuanlam te, ei zawnna aia Mizona leh kohhran/pâwl thil lo changchawi zawk te, ei zawnna bera rintlak leh belhchiandawl nih aia Mizona leh pâwl dah pawimawh zawk kan la tam hle a lo ni. Heng mite hi mi hlawhtling an ni chiah reng emt
Hnam changkang leh dingchang apiangin, an ei zawnna an dah chungnungin an dah pawimawh zel a. An ei zawnna kawnga mi rintlak nih kha an tum ber a ni zel a nih hi. Mizo chu huho nun nei, chhiat ni that ni leh tlawmngaih chhuah theihna kawng tinrenga inhnamhnawih thin kan ni. Kohhran leh pâwl thiltih zawng zawnga tel tum tlat thin kan ni bawk.
Hman lai kan nun, ei zawnna a inan vek lai, mi zawng zawngin lo an neih lai nun leh tun hun hi khaikhina, khang hun lai anga nun la hman reng theih a ni tawh lo. Chuvang chuan a ni, ziak mi duhawm leh philosopher ropui Vanneihtluanga pawhin, kohhrana inhmang chu kan ruai duh tawh lo tih thu a lo ziah tak hial chhan ni.
Ei zawnna ti bahlah leh ti buai lo zawngin a tlawmngaih theih a. Kohhran leh pâwlah pawh a inhman theih. Ei zawnna ti sukuk lo zawngin, chhiat ni that ni, kohhran leh pâwl hmalaknaah a tel theih tih kan hriata kan nunpui hma chuan, ei kan zawnna kawnga mi rintlak leh blehchiandawl kan ni thei ngai lo ang.
Dawr i nei a. Mahse, chhiat ni that ni, kohhran leh pâwl thiltih chhuanlama dawr i khar fo chuan, dawrtu i nei tlem tial tial ang a. Dawrtu (customer) nghet neih chu i tân a harsa hle ang. Mistiri, helper, mutia, dawr nghaktu, mi in leh lo sekrek khawihtu, chanchinbu sem etc thlengin, i rintlak (regular) theih loh chuan, tu mahin an ruai an ruai duh kher lo ang che.
Ei zawnna ti bahlah leh ti buai lo zawngin kohhran, pâwl leh Mizo culture-ah hian a tel theih. Mi kan buai tawh avang leh kan ei zawnna huang a zauh tak êm avangin, mi pawh kan inhre thiam tawn tawh hle bawk. Ei zawnna kawnga pawimawh ber chu rintlak nih hi a ni. Eng anga thiam leh tha pawh, a rintlak loh chuan tu mahin an ring ngam tak tak thei ngai lo.
Vengah mitthi an lo awm a, chhun lamah thlan i laih hman loha mitthi ina i kal hman loh pawhin, zan hun awlah i kal thei. Inneih leh thil tih dang a lo awm a. I hman remchan hunah i lawmpui thei. Mizo thalai zingah mi rintlak leh chhawrnahawm an pung ve tial tialte hi a lawmawmin, hnam anga hma kan sawnna a lo ni e.
Khawvel huapa mi hlawhtling kan tihte reng reng, an hnaah an chiangin an inpumpêk zel a. Mahni hna hmingthanpui hat thamte reng reng pawh, hnaa chiang an ni zel. Mizote erawh kohhran leh pâwla inhambuai chunga hna thawk thin, kan hun pawimawh ber pâwl leh kohhran tâna hmang thin kan ni tlat a. Mi tam takin kohhran inkhawm a tam lutuk an tihte hi, hna avanga nileng leh zan rei thlenga buai thin tân chuan sawi awm reng a nih laiin, hna avanga buai lem lo tân erawh inkhawm hi a tam lem thung hauh lo.
Zirlai kan nih hunai atanga mahni zirnaa chiangte reng reng, kohhran leh pâwl thiltihah an lang tam ngai lo. In lamah an tawm melh melh a, an thawhrah seng hun a lo thlen meuh chuan, mite awh leh chawimawi an hlawh hlauh thung thin a nih hi. Bawng hnute sem tak ngial pawh, regu leh regu lo inkâr chu hla tak a ni. Hengte hian min beng harh thei se, kan hnam nun pawh nasa takin a thangharh ngei ang.
A tawp berah chuan, Mizo culture leh a behbawm, tlawmngaihna te, chhiat ni that ni leh, pâwl leh kohhran thil tihte hi Mizo kan awm chhûng chuan an awm reng dâwn a. Henga inhman thiam kan zir telh telh a pawimawh ta a ni. Hengte hi kan thlauhthlain kan tel lo tur a ni lo. Kan hman remchan hun erawh pêk thiam kan zir a ngai ta tial tial a nih hi. Pathian thu nen pawh a inmil tih kan hriat nawn fo a tha awm e.