Aizawl: Central YMA President R Lalngheta’n Thawhlehni zan khan Kelsih khuaah YMA kumpuan ‘Ruihhlo Do’ a hawng.
Kumpuan hawnna inkhawmah Central YMA president chuan ruihhlo do tur hian hruaitute kuta dah mai lo vin, an zavai a an tan tlan a ngai, a then duty a, a then tawngtai a tan an lak te, sum leh pai thawh a ngaih pawh a thawh inhuam te pawh tul mai thei tih a sawi.
Hnam damna tura an chetchhuahna hi Pathian rawngbawlna a nih thu sawiin R Lalngheta chuan, “Kan choka a kang mek a, kan inpui a kan kai hma in kan tan a ngai a ni. Ruihhlo do tur hian kan tan tlan a ngai a, kohhran hruaitu te nen tih tak zeta kan tanrual hi a tul a ni,” a ti.
Kelsih Branch YMA-ah hian tun dinmunah member mipa 312 leh hmeichhia 292, an vaiin 604 an awm mek a ni. Kelsih khua hi Aizawl chhim lam. Aizawl atanga km 12 vela hla a ni.