Aizawl: Mizoram Pradesh Congress Committeee (MPCC) chuan nimin khan Congress Bhavana-a Golden Hall-ah ‘Union Budget 2026-27 Zirhona’ an buatsaih a. Resource person atan Prof. James L.T. Thanga, MZU hmangin, 16th Finance Commission (FC)-in kum 2018-23 tehkhawng chhutna atan a hman tlangpui avangin tu party tan mah an thawhrah tih ngawt a fel lo mai thei tih a sawi.
Prof James L.T Thanga chuan tun tum 16th FC-in tehna a siam a awm tih sawiin, “Geographical area-ah 10% point pek a ni a, Population-ah 17.5% point a ni. Population-ah hian Mizoram sorkarin 25% a rawt a, FC hian 17.5%-ah an dah a, point a put tlem khan Mizoram tan chuan a tha zawk a, Mizoram sorkarin 25% a rawt hi a tha lo zawk niin a ngaih theih. Forest-ah hian Mizoramin 10% a rawt a, Demographic performance 10% a ni a, heti hian Mizoram sorkarin rawtna a siam lo. Demographic performance-ah hian 10% a ni a, birth control lama kan chet that avangin Mizoram chet thatna tur ni mah se sorkarin rawtnaah a tel lo a. Per Capita Income Distance-ah Mizoram sorkarin 40% a rawt a, a sang zinga kan tel avangin kan chet chhiatna tur a ni bawk. Share of GSDP in GDP-ah hian Mizoramin rawtna kan siam lo va, GSDP thatna apiang state-te chan thatna tur a ni a, Mizoram tana tha tur a ni,” a ti.
Tun FC hian kum 2018-2023 tehkhawng chhutna atan a hmang tlangpui tih sawiin Prof. James L.T Thanga chuan, “Tuna sorkar mek ZPM performance hi tehna anga ngaih theih a ni lo ang a. MNF sorkar pawhin kan tih an ti ngawt thei bik lo vang. Tu party tan mah ‘kan thawh rah’ han tih ngawt chu a fel lo mai thei. 16th FC-ah hian local bodies leh disaster tih loh chu state/sector specific grant a bo thak a, Mizoramin Post Devolution Revenue Deficit Grant a dawn thin a tawp bawk,” tiin, Share of Tax pung angin lang mah se Revenue Deficit Grant a tawp tak avangin a punna hi a sang lutuk lo thei tih a sawi.
Budget-ah chuan hmasawnna chu a awm ngei a; mahse, pawisa hlutna a tlahniam nasa a, chu chuan investor-te a nghawng a, stock market a tlahniam nasa a, employment a tlahniam nasa tih sawiin tun tumah hian Mizoramin rawtna an thlen pahnih pawm a nih loh thu a sawi a. “He budget hi Mizoram tan lawmna tur a awmin a lang lo va, populist bedget a ni,” a ti.