Mizo tlangval, Vanlalruatfela chuan 16th Junior Body Building & Physique Sports Championship 2026 Junior Men’s Body Building 75 kg huangah bronze medal lain a vawi khat nan Mizoramin Indian Body Builders Federation (IBBF) buatsaih intihsiaknaa medal a la ve ta.
Inrinni leh Pathiannia Karimnagar, Telangana championship buatsaihah hian Mizoram Body Building Association chuan mi pahnih tirin ITI, Aizawla cheng, Ruatfela hian medal a la.
Govt. T. Romana College-ah BA IV Semester zir lai, Ruatfela hi kum 2024 khan North-East Physique-ah 1-na a ni tawh a, kum 2024 leh 2025-ah kum zawnin Mizoram Men’s Physique-ah 1-na a ni tawh bawk.
Nilaini khan Ruatfela hi a lehkha zirna, Govt. T. Romana College chuan an college-ah lawmpuina leh chawimawina hun an hmang a, Sports & Youth Services atangin Youth Welfare Officer Lalngilneia Colney-in hmanpui nghe nghe.
IBBF hi India rama bodybuilding association zingah dah san ber a ni a, World Body Building & Physique Federation, Asian Body Building & Physique Federation leh South Asian Body Building & Physique Sports Federation nena inzawm a ni.