Aizawl : Mizorama HIV darh zel tur leh sex atanga inkaichhawn theih natna (Sexually Transmitted Infection) darh zel tur venna turin Mizoram State AIDS Control Society (MSACS) leh AIDS Healthcare Foundation (AHF), India Cares te tangkawp chuan Aizawl Two-Wheeler Taxi Drivers Association (ATTA) te hnenah Condom ah-na tur jacket an sem.
MSACS sawi danin, “Mizorama HIV pai hmuhchhuah atanga za zela 70 bawr vel hi sex atanga kai an ni a. Chung zingah chuan a tam ber chu kum 15 atanga kum 40 inkar an ni. HIV kai hmuh chhuah te hi mi awm herh leh leplerhte ni kher lo vin, mi pangngai tak tak, khawtlang leh kohhranah pawh mi tangkai takte an ni fur. Kan hriat angin India rama State leh UT tina mipui awm zat mila chhutin HIV kai tam ber anga chhut kan ni,” an ti.
Hemi hre reng hian MSACS, AHF India Cares leh ATTA te tangkawp chuan a mamawhtu ten an mamawh huna awlsam taka an lak mai theih nan ATTA member-te kaltlangin condom uar leh zualin mipuite hnenah an sem dawn tih an sawi.