Tripura Natural Gas Company Limited (TNGCL) leh Food, Civil Supplies & Consumer Affairs (FCS&CA) tangkawp buatsaih, pipe hmanga gas semchhuah dan tur chungchang inhrilhhriatna FCS&CA Minister B lalchhanzova’n khuallian niin Ningani khan a hman pui.
ATI Auditorium, MINECO-a ‘Sensitization Workshop on City Gas Distribution (CGD)’ buatsaihah khuallian B Lalchhanzova chuan, Tripura-ah chuan kum 30 chuang Piped Natural Gas (PNG) hman a nih tawh thu leh mi 60,000 chuangin an hman mek thu a sawi a. Ram dangah chuan domestic mai ni lova motor-ah te pawh Compressed Natural Gas (CNG) anga hman thin a nih thu leh, hotel leh restaurant hmanga eizawngte tan pawh sum sen a tlakhniam dawn thu leh Mizo economy hmel a tidanglam dawn tih a sawi.
Minister chuan March 2027-a Indradhanush Gas Grid Limited (IGGL)-in Sihhmui thleng gas pipeline an phum thlen hnua TNGCL-in Aizawl leh Mamit-a PNG hman tura an thlun tur chu kum 2028 tirah Mizo mipuiin an hman tan theih beisei chunga hmalak lawk theih ang ang a rang lama bawhzui tan a nih thu a sawi a. Pipe hmanga gas semchhuah hmalaknaah hian kalkhawmte chu Mizoram hmasawnna atana an thawhpuite an nih thu sawiin, mipui zirtirna pek lamah pawh theihtawpa tan lakpui turin a sawm.
Khualzahawm TNGCL Managing Director Pralay Patra chuan natural gas chungchang te, khawvel boruak chhe zual zel leh lum tulh tulhah natural gas hman a that zawk thu te, India sorkar laipuiin kum 2030 hmain energy source 15% chu natural gas nihtir a tum tih thute a sawi a. He hmasawnna hi sumdawnna mai ni lovin khawvel boruak chhe zel tur dalna pakhat a nih thu a sawi.
He workshop-ah hian TNGCL atangin an Managing Director bakah SC Reang, Director (Commercial) leh an engineer-te an tel a. Sorkar department hrang hrang aiawh te, IGGL, MCU, Aizawl Local Council Association, AMFU, Central YMA, MHIP, MUP, MZP, MSU, Mizo Youtubers Association, FCI, BSNL, SBI, AMPEDA, MIDA, Mizoram Merchant Association, Mizoram Journalist Association (MJA), Govt. Mizoram Law College Consumer Club, Mizoram Industries Owner Association leh social activist te an tel.
Sorkar laipuia Petroleum and Natural Gas Regulatory Board chuan uar zawka natural gas hman a nih theihna tura India state (Andaman & Nicobar Islands leh Lakshadweep tih loh) hrang hrangah City Gas Distribution Network siam nan entity hrang hrang hnenah thuneihna a pe tawh a. TNGCL hian Mizoram leh Manipur a chang a ni.
Natural Gas Pipeline hi Panisagar Terminal, Tripura atanga intan niin Sihhmui, Mizoram-ah Receiving Terminal bun a ni dawn a. Panisagar leh Sihhmui inkar pipe thui zawng hi Km 119.5 niin Pipe diameter hi feet 1 a ni a, leimin leh shock laka him tur pipe hman niin pipeline hian Kanhmun, Zawlnuam, Kawrthah, Tuidam, Darlak, Mamit, Lengte te a paltlang dawn a; Panisagar – Sihhmui inkara pipe phum hna hi IGGL ten thawkin, Sihhmui Terminal atanga Aizawl khawpui chhunga gas sem darh leh enkawlzui hna chu TNGCL ten an chang ve thung dawn a ni. Aizawl khawpui bakah hian Mizoram hmun hrang hrangah a tahtawla la semdarh zel tura ruahman a ni bawk.
Tripura – Mizoram Gas Pipeline Project hi North East Natural Gas Pipeline Grid hnuaia mi niin, December 2027 velah thawh zawh hman beisei a ni a, tun dinhmunah 45% vel thawh zawh tawh a nih thu IGGL hotute chuan an sawi.