Mihring

• F. Vanlalrochana

Tlai ni tla tur eng sen phut mai te chu mawi I tih tawh loh a, zana thla lo engah i lung a len tawh loh a, a tuk zing ni chhuak tur pawh i nghak hlel tawh lo a nih chuan, i mihrinna chuan a chhuahsan tawh che tihna a ni.

Ram ngaw hring dupa mai chuan i ngaihtuahna a la tawh lo a, chu hmuna sava hram chiah chiah leh thing leh mau thliin a chhem rik seng sengte leh lui tui luang ri her her te chuan rimawi a pe zo tawh loh che a nih chuan, i mihrinna chuan a chhuahsan tawh che a ni.

Social Mediaa tute emaw thu vawrh darh emaw, an thusawi emaw hmanga thu dik i zawn a, youtube-a tute emaw inkawmna atanga dikna teh fung i khai tawh a, hmaichhana hmu la an thurawn i lak ngai reng reng loh turte thu chu innghahna atana i hman tawh a, mahnia thudik zawn tumna reng reng i nei tawh lo a nih chuan, i mihrinna chuan a chhuahsan tawh che tihna a ni.

Instagram-a an inpho lan dan atanga mawina i teh a, khawlin rawng a remkhawmah te chuan duhawmna i zawn tawh a, hlutna te chu miin a inpho lan danah leh a neih a phochhuah danah te chuan teh tawh zawkin, mi dangte chu tling lo ta riaua hriaiin, mahni ngei pawh chu, tlaktlai lo ta riau te a i inhre ta a nih chuan, i mihrinna chuan a chhuahsan tawh che a ni.

Pawisa atangin khawvel i teh a, a neih dan lam aia a neih zat i ngaih pawimawh tawh a, a neia te chu, dik loa neite chu i pawi an sawi a ni tih ngaihtuah thleng lo a, an pawisawi i hlau zawk a nih chuan, i mihrinna chuan a chhuahsan tawh che a ni.

I mihring-puite chu hlep hmuhin i hmu a, mi dangte chan ai zuah ve miah loin, i ta lo tur thleng thlenga lak chu hreh lohin, i hlawh chhuah ni miah lo i hum haw a. Man to uchuakin thil i zuar a, i mihringpuite chuan i phut zat an pek che chu an batah i ruat tawh a. I mihrinna chuan a chhuahsan tawh che a ni.

Inlaichinna te chu hlawknaa i teh a, i hlawkpui turte chauh i biak that a, i thatpui turte chauh i zui a, an kephah liah pawh i hreh tak miah loh chinah chuan- an kut atangin i chan tur sahrang an rawn theh chhuak dawn miau si a-zahpuiawma awm chu zahthlakah i ngaih tawh si lo. I hlawk dawn a nih phawt chuan i bianga an piai chu pawh pawi i tih tawh si lo a, phur takin i dawh tawh zawk a. I mihrinna chu i hralh fel der tawh tihna a ni a, nang chuan i pawisa tawh der si lo.

I taksa i hlut tawh loh a, i duhzawng leina tur a pek dawn che chuan i phal rai hreh lo a, Urlawk zan chauha naupan laia dawh thla thinin, kar tin mai zan thum emaw zet mi hrang hrang atanga daw hthlak chu a hlawk em avanga inthiam lohna nei miah loa i kar fo takah chuan, ka ta tih tur nei si loin, ka ta titu awm si loin, mana i lei i lo ni ta a, tu ta mah ni si loin, i ta pawh i ni ta lo. I mihrinna chu i hralh ta a ni, nang chuan i pawisa tawh der si lo.

Ruihhloa sumdawn emaw, rangkachak tawlha sumdawn emaw, hlawk thutna dang apiang chu a tha lo tih hre tho chung a, hausa tura rei i beih peih loh avanga i zuan tak avangin, i inte chu ropui hle mah se, i incheina chu mawiin, i lirthei te chu changkang hle mah se, i inhungna him tak chhungah chuan i mutui tawh si lo a. Tawngtaia inkhawmpui tur chein, huhoa koh thin nei mah la, sim chu i ui tlat avangin i thla a muang zo si lo. Zakaia anga sim turin i chak tawk si loh avangin, nuam tur emaw tia i um chuan a tihrehawm che a, himna tur emaw i tih chuan a a tiralti zo ta che a nih hi. I ei ral khawvelin a ei ral ta che a, i mihrinna i hloh ta a ni.

I hnampuite chu i hlawkna telna mai tura i hmuh tawh avangin, thil man, ram man i to a, a thau sawk theihna lai apianga i ram leh hnam thau sawh i hreh tawh loh hi i inhre thiam lo mai thei a, nangmaha mihringa kha a awm tawh lo a nih kha.

Ram hmangaihna phena biruin, ram rawngbawlna chu sumdawnna ang lekah i ngai a, tham then chu pawisa lo ni mai loin i chanvo la ve rengah i inngai tawh a nih kha, i inhmu thiam der si lo. Nangmaha mihringa kha a awm tawh lo a nih kha.

Nawmchennaah hlimna kan zawng a, sum leh paiah lawmna hmuh kan tum a, kan thih san mai mai tur bungrua leh ramah te hahchawlhna kan zawnga, kan hloh leh mai mai tur thuneihna umin kan tlan a, engmah vuan nghet thei loin kan kut kan hum a. Kan mihrinna kan tichhia a. Kan nun a tuihal a, kan dang ro tih chu pawm duh loin, dang hnawnna kawng dang kan dap a. Kan inpal pelh a, kawng ngil awm renga kan kal pai dan dan te chu kal dan tur dikah kan ruat ta!

Mi chet chhiat chu kan hlimpui a, mi vanduaina hmuhnawm kan ti a, mi thihna chu ngaihnawm kan ti a. Chutiangah te chuan inhnang fak kan tum ta a. Kan nuih tiza thil te chuan min ei chhia a, kan thatpui tur thil tur te kan nuihzat a, kan damna tur lem duh loin kan chhhak chhuak a, kan kein leiah na takin kan rap hrual thin.

Mahni hi lei leh van lai taah kan indah a, engkim mai leh tu pawh mai chu kan duhzawng min tihsaktu tur hmuhin kan hmu tawh a. Kan ei loh zawng sawitu a chhe thei ang berin kan chhuah a, kan duh zawng min tihsak lotu chu kan do a. Kan duhzawng neihna tur a nih chuan, dawt ngial ngan kan sawi hreh tawh lo a. Zeldin thu bawl nen kan vawrh darh tawh a. Ni miah lo nihtir tumin kan hman hlel a, khawvel hran dinin, a tak ram hran ka siam chawp thin a. Mi dang thau sawh a, anmahni zuk hlum thakte chu kan tih tur rengah leh kan mawhphurhnaah kan ngai ta emaw tih tur a ni ta. Kan mihrinna kan bosan nasa ta em a ni.

Chak zawng nei loin zing kan tho a, phur pui nei loin ni kan leng a, suangtuahna nei loin zanah kan mu a. Dam chhan nei loin kum kan hmang ral a. “NUN” hian awmzia nei ta loa hre lo thei hi kan ni lo; dam reng siin kan nung tawh lo a, kan taksa mit meng mah se kan thinlung mitin khua a hmu tawh lo a. Buaipui nei miah si loa buai lo thei hi kan ni lo. Kan mihrinnna nen kan inmihran ta miau si atin nih hi!

We are the hollow men
We are the stuffed men
Leaning together
Headpiece filled with straw. Alas!

• TS Elliot