Aizawl : Rajya Sabha member K. Vanlalvena’n Parliament Session neih mekah thu sawiin, Mizorama kawngpui pawimawh pathum siam thuai a tul thu sawiin, Aizawl leh Sairang inkar four-lane kawng leh Hnahthial atanga Saisihchhuah kawngpui siam turin sorkar laipui a ngen.
Parliament session neih mekah Ningani khan Rajya Sabha MP K. Vanlalvena chuan Zero Hour-ah thu sawiin, Hnahthial atanga Myanmar ramri kawng pahnih Hnahthial-Tarpho-Khawhri-Cherhlun-Thingsai-Bualpui H-Saisihchhuah kawngpui leh Hnahthial-Tuipui D-Darzo-S. Vanlaiphai-Sangau-Pangkhua-Saisihchhuah kawngpuite chu National Higway a puang ve ve turin sorkar laipui a ngen a. Kum 2020-ah Myanmar sorkar-in Chin state khawpui Hakha atanga India leh Myanmar ramri Saisihchhuah thlenga double lane kawngpui an sial zawh tawh thu leh sorkar laipuia Ministry of Commerce and Industry-in Saisihchhuahah ramria insumdawn tawnna hmun tenau Border Haat a puang tawh chungin kawngpuiin a la pawh loh thu a sawi.
He kawngpui hi sial tlang a, National Higway-a puan an nih chuan Act Eat Policy tih hlawhtlinna atan te, ram venhimna atan te leh Mizorama tribal mipuite ei leh bara hma an sawnna atan te a tangkai tur thu a sawi.
MP K. Vanlalvena chuan, Sairang rel station hawn thar a nih atangin Aizawl leh Sairang inkar lirthei tlan zat a pun phah nasat thu sawi bawkin, tuna kawngpui awm mek National Higway No. 54 chu a zau tawk tawh loh thu leh a rang thei ang bera four lane kawngpuia siam a tul thu a sawi bawk.