Aizawl : Thenzawl a zirna in ding hmasa ber leh upa ber Government Primary School One, Thenzawl chuan nimin khan kum 100 an tlin lawmna hun an sikul building, Thenzawl Field Veng ah an hmang.
Centenary lawmna hi Headmaster in charge PC. Rokunga’n kaihhruaiin, Thenzawl Joint VC Chairman B. Lalrinliana’n khuallian niin a hmanpui a. Khuallian chuan kum 100 tling thei sikul chu Thenzawl leh Mizoram tan rohlu a tling tih sawiin, he sikul atang hian mi hlawhtling tak tak an lo chhuak tawh a, tihchangtlun zel anih theih nan sorkar, khawtlang hruaitu leh mipui ten tanlak a, theihtawp chhuah zel tul a tih thu a sawi.
He hunah hian he sikul a lo thawk tawh pensioner te, khawtlang hruaitu VC leh NGO aiawh ten thu an sawi a, zirlai ten special item an neih bakah, zaithiam te an zai a, tlaiah Centenary lawmna ruai an theh nghal.
Govenment Primary School pakhatna, Thenzawl hi kum 1926 a din niin, tun dinhmunah zirlai 15 leh zirtirtu panga an awm mek a ni.