Aizawl : Hmar Students Association (HSA)-in Sinlung Hills Council (SHC) hnuaia office peon turah an area mi lak an nih loh avanga lungawi loin SHC pisa kawtah an pungkhawm.
Sinlung Hills Council hnuaia office peon tur laknaah Sinlung Hills Council Area mi pakhat mah lak an ni loh avangin Hmar Students Association (HSA) Joint Headquarters, Aizawl chuan Hmar hnam thisena an lei Sinlung Hills Council chu area pawn lam miten an palzut nia hriain, Ningani zing dar 9:30 khan SHC pisa tualah an pungkhawm a, chawhma dar 11 khan Sinlung Hills Council Chief Executive Member, Ricky Lalremsanga leh Hmar Students Association hruaitute inbiain, zirlai pawl hian lehkha an pe a, hemi hnu hian pungkhawmte hi an tin a ni.
HSA hian GAD Principal Secretary-ah SHC hna laka an lungawi lohna hi an thlen bawk a, a copy hi Mizoram Chief Minister leh SHC CEM hnenah an pek bakah, Adviser to CM (Political) Lalmuanpuia Punte hnenah an pe bawk a. Adviaer to CM (Political) hi amah hmuin, SHC hna lak tura an lungawi loh dan leh Sinlung Hills huam chhunga mi ngei lak an duh thu an sawipui a ni.