Aizawl : Chief Minister Lalduhoma chuan Mizoramin dehchhuah a neih a, hnathawh tur a lo pun theih nan thalai thiam thil nei tha tak takte chu chawikan an tum thu a sawi.
Confederation of Indian Industry Centre for Excellence on Employment & Livelihood (CII CEL) leh Mizoram sorkar tangkawpin Mizorama MSME neitu, hmasawn zel tumte intuaihriam nana buatsaih, Micro & Small Entrepreneurs Excellence Project in Mizoram leh Mizoram Entrepreneurs Development Forum chu Ningani khan chief minister Lalduhoma’n I&PR Conference Hall-ah a hawng.
Chief Minister chuan, Mizote hi tunhma atanga thiam thil ngah tak hnam an ni a. MSME lamah hmakhaw eng tak an nei a tih sawiin, “Kan ramin dehchhuah a neih a, hnathawh tur a lo pun theih nan heng kan thalai skill nei tha tak takte hi chawikan kan tum a. Kan entrepreneur-te hi an bana kaia dinchhuahtir kan duh a, kan flagship scheme Handholding hian an tan remchang a siamsak mek a ni,” a ti.
MSME neitute pawh hi thiam thil nei tha, mahnia eizawnna bul lo tan a, tha taka lo kalpui tawhte an ni a. Tuna an dinhmun atanga sang lehzuala an lawn theih nan he project hi an buatsaih leh ta tih sawiin chief minister chuan, “Khawvel a changkang zel a, sumdawn dan changkang zawk a piang mawlh mawlh reng a. Kan MSME te pawh hmasawn zawnga an kal ve zel loh chuan an hnungtawlh mai ang tih kan hlau a ni,” a ti bawk.
Chief Minister-in a hawn project pahnihte hi Mizoram MSME neitu, an hnathawhna lama hmasawn zel duh, tunlai thiamna thar ber ber nena intuaihriam duhte tana buatsaih a ni a. Mithiam zawkte nena an mamawh sawihona pawh siamsak an ni ang a. Kum khat chhung kalpui phawt tur niin, mi 70 te training tura thlan an ni.