- Dr. C. Lalrampana
Aizawl Traffic Police leh Transport Department tangkawp chuan Thawhtan [09/02/2026] zan dar 09:00 atang khan garage neilo, kawngpui dunga lirthei dahte zawn chhuah hna an kalpui tan a, a tihzia hle mai.
Kawngpui dung endik hna hi Chaltlang, Chanmari leh Chanmari West-ahte kalpui niin; garage nei lo nia hriat lirthei 141 (LMV 42, 2Wheeler 99) an endik. Aizawl Traffic Police chuan Gauhati High Court thupek anga endik an nih thu sawiin Garage nei lo,kawngpui dunga dah reng ringawtte inhmakhua turin an ngen a ni.
Motor Vehicles Act (MV Act)-in India garage chungchangah engtinnge a sawi thlir lawk teh ang:
MV Act hnuaiah garage hi motor [lirthei] dahna emaw, siamthatna hmun atan emaw hman a ni. Garage hman theihna turin phalna leh licences hran neih a ngai. Garage-te hi himna leh ram leh hmun vawn himna dan a nih avangin zawm ngei ngei a ngai. Chhiatna emaw, lirthei chhia emaw a thlen chuan, garage neitute’n mawhphurhna an nei.
- Dan 14: Tunlaiah tumah garage neih/hman phalna nei lo chuan hman loh tur.
- Dan 177: Garage neitu emaw, luah emawtu chuan dan a zawm loh chuan pawisa chawi ngei tur.
MV Act hian garage enkawl dan tur a siam a, himna leh ram leh hmun vawn himna turin hma a la a ni. Mahse, dan hrang hrangte hi state leh region a zirin a inang lo thei.
MV Act hian lirthei lei nan Garage a neih a phut lo. Mahse, he dan hian lirthei neitute chu an lirthei dahna tur hmun emaw ruahmanna dik tak emaw an neih a ngai a ni zawk.
India ramah chuan lirthei lei dawnin garage neitu nihna finfiahna lantir a ngai lo. Mahse, registration atan address dik tak i pek a ngai a ni.
Chutiang a nih lai chuan, state emaw, tualchhung thuneitu ?henkhat emaw chuan lirthei dahna chungchangah dan emaw, thupek emaw bik an nei thei a, a bik takin khawpuiah chuan. Entîr nân, khawpui ?henkhatah chuan lirthei neitute chu lirthei dahna hmun ruat sa neih emaw, lirthei dah phalna pek emaw a ngai thei.
Chuvangin MV Act hnuaia lirthei lei nan garage neih hi direct requirement a nih loh laiin, parking arrangement dik tak neih hi a pawimawh hle.
Mizoram State Transport Authority hnuaiah garage chungchang dan chu “No Garage, No Car” tih a ni. Hei hi Aizawl khawpui chhunga lirthei neitute tana garage neih ngei ngei tur tihna a ni. Dan hi October 31, 2017 atang khan khauh taka kenkawh tura tura tih a ni a, “garage nei lo chuan lirthei register theih a ni lo” tih a ni.
He dan hi traffic congestion nasa tak sut kian nan tih a ni a, lirthei neitute chuan garage neih ngei ngei tur a ni tihna a ni. Aizawl khawpui chhunga lirthei neitute chu garage nei turin hriattirna pek an ni.
Garage chungchang dan zawm lote chu:
- Lirthei register theih a ni lovang;
- Penalty pek theih a ni.
Mizoram State Transport Authority hian lirthei dan bawhchhiate chu an hrem thin a ni. Garage chungchang dan hi zawm ngei tur a ni.
He dan khauh tak hi awm mah se, tun thlengin dan anga kalpui theih a ni lo tih chu mipui vantlang hriat a ni. Sawrkar hian dan ang tak hian kalpui ta se 70% vel hi lirthei nei thei lo tur kan ni hial awm e. Mahse, a dera nung thang kan ni bawk a, nitin a tam tual tual a ni.
Mizoram STA chhut danin nitin lirthei pung zat hi chiang taka sawi theih a ni lova. Mahse, kum 2021 chhung khan Mizoramah lirthei 25,391 ziah luh thar a ni a, Aizawl district bikah lirthei ziah luh thar 17,323 awmin, chawhrualin Aizawl district bikah nikum chhung khan thlatin lirthei thar 1,443 vel awm belh ang a ni a, nitin lirthei pun belh zat chu 48 vel a ni bawk.
Kum 2025 May thla chhungin Mizoram-ah lirthei thar 2,539 ziahluh hman niin, Two Wheeler thar 1968 ziahluh hman a ni a, lirthei dang hi 571 a ni. Chawhrualin nitin lirthei pung zat chu 82 vel a ni.
Kum 2024 leh 2025 chho khan Mizoramah lirthei a pung nasa hle a, kum 2024-ah lirthei 3,09,832 awmin, kum 2025-ah lirthei 3,54,914 a awm tawh.
“No Garage, No Car” tih chu kan zawm lem lo tlang hle. Hetiang a nih avang hian fekfawn taka dan hi kalpui theih a ni lo.
Aizawl Traffic Police leh Transport Department tangkawpte hian zan lam lirthei van laia kawngkama lirthei dahte ai hian zema bawk – kulikawn kawngpui kama dawr neitute nileng lenga lirthei hung nitin thinte leh lirthei dah duhdah lutukte hi nitin vaiin man zawk se, Traffic jam a ziaawm ngei ang. Chhunah lah veng thenkhat intifekdawn lutukin pawimawha kal vel lirthei dah zawk pawh ngai thei lo leh mipui vantlang ram hmunhma zau lai leh mahni kawt zawn kawngkam apianga “NO PARKING” tih lo tar ve zel ringawtte hi manin hrem ve se a tihzia ngawt ang. A nihna takah chuan smart parking or parking nei tha lo kan ni bawk nen zan lama felfai taka kawngpuia lirthei dah fel thlapho ai chuan chhuna nileng lenga mahni dawr kawta lirthei hung thinte hian Traffic jam an siam tam zawk daih niin a lang. Bazar hmun Shopping mall/shopping complex vela lirthei dah thliah thluah hi Smart City tihdan tur a ni lo. AMC sum duh lutukin dawrkai hausaho a hlau lutuk hian Aizawl khawpui Traffic a tibuai zawk niin a lang. Chuvangin, Traffic Jam a taka sukiang ngam tur AMC inthlan 2026 lo awm turah hian Auzawl mipuite hian I thlang chhuak ngam ang u.