- K. Hmingthankaia
Keini ho ram hmangaihtute, mi fel leh mi tha lutuk, mi dik em em maite hnenah hian-
Hei, lo kalna tur tham khawp engmah in rawn sawi chiang lova, chhui tur thil sual tih a awm ngei a ni tih proof na tur eng document mah pawh in rawn thehlut tel chuang bawk si lo naa, kan hming in sawi nasa lutuka kan lo kal ta tho a nih hi. Enge hriat in duh ber leh chhui se min tih ber chu ni reng reng a? tiin min zawt ta ang se-
Keini’n- Ih maw, Pu CBI, englo a nia, thil sual chhui tur a awm chiah chu kan hre tak tak chiah chuanglo naa, kan dinhmun hi min hriat thiampui ula. Party ve rengruang ni ta chuan sawrkar lai hi kan erin kan thik si a, chuvangin, tih hmingchhiat dan kawng hi kan zawn ve ngar ngar reng a ngai si a. Chutih laia IAF hnena Lengpui ram hralh tih thu lo ri ta hlauh mai chu remchang hi kan han ti lutuka, i hi le, chu le.. tiin, a engamah hmain phur sa loh lohin kan lo phura, mipui rilru tih chi-aia, mipui rilru tih phawkleka, mipui rilru tih nghin duala, mipui buma mipui rilru hruaikawi theih kan inbeisei lutukin in hming kan lam ta chul mai a nih kha. Min lo hrethiam dawn nia.
Chutih rualin, nangni hi kan ngaisang lutuk che u a, thil enge maw hlekah hian intihtheih nan leh intihthaih nan tak hian in hming hi vauchher tehah kan lo hmang ta mai thin zawk a ni e. Chuvangin, hei, in lo kal ta sa sa bawk a, eng eng emaw tal chu min chhuisak rawh u aw.
CBI- Enge in hriat chak em em chu? Sawi vat vat rawh u, kan haw leh vat duh. Hnadang pawimawh lutuk kan ngah a nia.
Keini- IAF hnenah Lengpui ram khu tuin nge hralh reng reng a?
CBI- A neituten an hralh.
Keini- A neitu chu tunge ni a? Tu phalnain nge an hralh reng reng? An leina rate engzat nge? A rate a to uchuak em ni? Pawisa hi tu kutah chiah nge a luh?
CBI- A neitute chu in hriat chian tawh kha. A neitute leh Mizoram sawrkar phalnain India sawrkar IAF-in a lei. A rate chu sqr. ft.1 rs. 185 a ni a, a ram pumpui zau zawng chhut chhuah man leh an dawn tur dang chhut chhuah chu cheng 198,78,55,155 chiah a ni, a dik thlap. Tuna sawrkar leina rate hi a to uchuak lova, hmun dangah chuan hei aia to mah zawka lei a ni thin zawk a ni.Tin, a man pawisa pawh hi a neitute kutah a lut ang chu. Heng thilte chu in hriat vek tawh hnu a nih kha. In sawrkar pawhin a sawi fiah vek tawh a, mi thahnemngaite leh TV leh chanchinbu lama an sawi pawh in hre vek tawh a ni lawm ni? Ngatinge keini lam daih daih min la zawh zel chu ni le?
Keini- A ni khawp mai. Ih, englo a nia, tute nge a pawisa hi lo chang ve reng reng ang le? Engtinnge an hman ang le? tih lai tak hi kan hriat chak ber leh kan hriat duh lai ber chu a ni a. Nangni hian min chhui sak ula kan ti a ni ber e.
CBI- In va ho tak em ve le.. In ho nge, in mawl nge, in tenawm ka ti zawk dawn ni. Eirukna leh pawisa thianghlimlo, Black money pawh a ni lova, thil sual inthup a awm pawh a ni lova, an hralhna man pawisa chu an duh duh danin an hmang anga, an duh duh an pe ang chu. Nangni lo mangan ve em emna tur a awm em ni? A thuhrimah Sihphir ram nen thil inang chiah a ni a, ngatinge Sihphir ram sawi tel ve lova Lengpui ram chauh in sawi bik a?
Keini- A ni khawp mai Pute u, kan thiamloh a ni e. Lengpui ram han tih hian, Airport nen ngaihzawm theih tak a nih bakah, engemaw ti takin mipui beng a verh kan beiseia, Sawrkar lai tih mualpho theihna a nih theih tak hlauh beiseiin kan au bengcheng ta chul a nih kha. Mahse, mipui rilru hi kan tum angin kan ti nghing dual thei leh tak tak mang si lova, a pawi khawp mai. A hma pawhin FCAA chungchangah pawh mipui tih chi-aia tih phawklek kan lo tum tawha, kan la hlawhchham zel chu a nih hi. Tun tumah chuan min ngaidam ula, thildangah kan la rawn ko leh zawk ang che u.
CBI- In awmdan hmuh leh tuna min koh chhan thlir hian, thildang min koh lehna tur pawh a ho leh ngawt ang chu. ZPM sawrkar hnu hian kan kawmthlangte khu an hlim sawt riauva, enge a chhan? CBI-in chhui rawh se. Kan kawmchhakte khian kohhranah thawhlawm an pe tam ta riau mai, CBI-in chhui rawh se. Chumite chuan hma an sawn lutuk, CBI-in chhui rawh se. Chumi chuan a inhmun LSC a then thei awlsam bik lutuk. Chubakah, a fanu hming pawhin a dah ve lova, a makpa hming zawkin a dah, engatinge? CBI-in min chhui rawh se, tih ang vel bak kha a ni leh chuang lovang.
Tuna min kohnaah pawh hian sawrkar pawisa eirukna lam emaw, thil diklo tihna lam emaw pawh a awm miahloh hi. Mi ram hralh leh mi pawisa inpe velah in lo buai mai mai a nih hi. Nangni rilru diklo ho zawk hi chhui ngai in nih hmel zawk.
Tin, kohhrana thawhlawm thawh tam chungchang phei kha chu, in zingah pawh chhui chakawm deuh, vawikhata kohhran thawhlawm cheng nuai 30 chuang pe pawh an awm a ni lawm ni? Kha’ng zawkte kha ngaihven zawk ta che u.
A thuhrimah India sawrkar thuhnuaia awm, chawmhlawm in nih te hi hria ula, India national security te hi in lo sawibuai ve phak em ni? Ramdang nena intihbuaiin India hi a che chhe zawkah tang se in ti em ni? Burma leh Bangladesh run mai te in hlau lo em ni? Tunah pawh Bangladesh chuan N. E. India run a tum thu a sawi fova, NE leh India ram laipui inzawmna ringrek, ram chep lai tak, Chicken’s neck an tih, Siliguri corridor an tih bawk lai chu danchah a tum thu a sawi fo hi. Mizoram phei chu Bangladesh tan chuan belchhunga sa in ni asin. In hlau lo em ni?
Keini- Ni e, kan lo thiamlo a ni e. Duhtawk tawh ang u. Mah reng reng se, Central sawrkar pawh hian pawisa hi a ui lo hrim hrim. Pu Modi-a leh Rajnath Singh-te pawh an ti mak hrim hrim bawk. Pawisa hi anni pek ai chuan keini min pek zawk awm tak. NLUP leh SEDP sem atan kan mamawh ve tho si a.
CBI- In ho em mai. Kan haw daih dawn. Thil ho lutuk leh thil nazawngah kan hming hi lo lam chhen tawh suh u. Min ngai hniam leh lutukin CBI hming in ti common lutuk. . Chutilo chu in beisei loh lam daih zawkte kha kan rawn chhui vak mai tur che u a nia. Sawrkar tawh lo bawk, CBI thiamloh chantir bawk in awm fur mai tur asin. Bye bye ule, an tih duh hmel te ka lo ti ve deuh vel mai mai a ni e.
Thil pakhat, pawisa khi mimal neihah chuan kei chuan tam ka lo ti leh lutuka, lo awh ve ngaihna pawh ka hre lova, ka rap lam zawk mah a ni. Min pe dawn pawh nise, ka mamawh bak, a vai vai chuan ka la ngam kher awm love. Mahse, thluaka sum lut ho tan chuan lo at phah deuhthaw hialna tur leh, CBI CBI lo tih chulna tham a lo ni ta si a nih hi.
Mite vanneihna chan chu mak leh ngaihnawm sawia sawi zawk tur niawm tak chu mangan nana hmang kan lo awm zawk ta si a.
“Mi sum lo awh ngawih ngawih hi sual tinreng bul a ni si a.”