India-a football inelna sang ber dawttu ni mek, I-League hming chu an thlak danglam a, Ninganiah khan All India Football Federation (AIFF) chuan a hming thar hi Indian Football League a nih tawh thu an puang.
AIFF chuan an X account-ah, “All India Football Federation Executive Committee chuan online meeting kan nei a, hetah hian 2025-26 season atangin I-League hming chu Indian Football League tia thlak kan remti e,” an ti.
I-League hi kum 2007 atang khan India-a football inelna sang ber a ni thin a, 2022-23 season atang khan a sang ber dawttu a ni tan a, Indian Super League (ISL) chu a sang ber a ni ta a ni.
2025-26 season chu February 21 atanga tan tur niin a tel tur club hrang hrang neitute chuan AIFF hnenah a hming thlak hi an rawt a, an rawtna hi an pawmsak a ni.
Real Kashmir FC neitu, Arshad Shawl chuan, “I-League chungchangah hian chanchin tha lo lampang sawi neuh neuh a tam hle a, hei vang hian boruak tha zawk nen hun thar siam chhuah kan tum a ni,” a ti.
“A nihna te, a kalphung te hi thlak danglam vek kan duh a. He league hi a rei tawh hle a, India rama club kalphung nghet siam chhuaktu a ni hial a. Tun hnaia India rama football dinhmun tha lo tak karah he league hi chawisan kan tum,” a ti bawk.
AIFF chuan Indian Football League buaipui tur hian member panga awmna Governing Council an din a. Gokulam Kerala, Real Kashmir, Rajasthan United FC, Diamond Harbour FC leh Shillang Lajong aiawh te an tel ang.