Aizawl: Sports & Youth Services Department leh Innovations India tangkawpin ‘Connecting India, Developing Mizoram, Empowering Sports’ tih thupui hmanga an buatsaih, 2nd Aizawl International Half Marathon (AIHM) chu Inrinni tuk khan Rajiv Gandhi Stadium, Mualpui, Aizawlah Larsap General (Dr) Vijay Kumar Singh, PVSM, AVSM, YSM (Retd), AIHM 2026 Patron ni bawk chuan telpuiin marathon-a tlante a vai liam a, a kharna hun a hmanpui.
Larsap chuan hlawhtling taka AIHM tum hnihna buatsaih a ni chu lawmawm a tih thu sawiin India hmun hrang hrang bakah ram dang atanga tel eng emaw zat an awm chu fakawm tiin, “Hei khawvel huap a nihzia a lantir a, a than chakzia leh khawvel ang pawha hriat a hlawhzia a lantir a ni,” a ti.
AIHM chu Mizoram mawina leh boruak thianghlim pho chhuahna hun remchang a nih thu sawiin, hmun dang atanga kalte chu khual tha an nih tel thu a sawi a. Mizoram an cham chhunga hun hlimawm tak hmang tura duhsakna hlanin nakum lamah pawh thiante, chhungte leh infiammi dangte nen marathon tlan tur chauh ni lo, Mizoram belchiang tura lokal leh ngei turin a sawm.
Sports Minister Lalnghinglova Hmar chuan AIHM chu a kum tela a pui chhoh zel thu sawiin nakumah pawh kumin aia ropui leh changtlung zawka buatsaih tum a nih thu a sawi bawk.
He hunah hian Environment, Forest & Climate Change Minister Lalthansanga, Health Minister Lalrinpuii, Lt. Col. Clement Lalhmingthanga, MLA, Capt Rahul Bali, CEO, Innovations India & Curator of AIHM 2026 leh official dangte an tel a ni.
AIHM 2026-a tel mi 3,000 dawnte hi larsap chuan a vai liam a. Category hrang hrang pakua – 21.1 km Half Marathon (Men& Women), 10 km Open Race (Men & Women), 5 km Fun Race (Men & Women), 5 km Junior Race (Boys & Girls) leh 5 km Senior/Veteran (above 60 years) Race-ahte then a ni.
Rajiv Gandhi Stadium atanga bultanin world bank road-ah an tlan a, bultannaah tawpna siam a ni. India hmun hrang hrang bakah Kenya, Ethiopia, Bahrain, United Kingdom, France atangin runner 16 an tel a. Lawmman Rs. nuai 15 chuang sem chhuah a ni.
AIHM 2026 RESULTS
HALF MARATHON RACE (21.1 km)
Women category:-
1) First prize: Renu Singh (Uttar Pradesh, India) Chip Time 01:21:22 (Rs 2,00,000 + Medal+ Certificate)
2) Second prize: Tsige Debay Tadese (Ethiopia), Chip Time 01:21:35 (Rs 1,50,000 + Medal + Certificate)
3) Third prize: Marta Hirpato Yota (Bahrain), Chip Time 01:21:36 (Rs 75,000+ Medal + Certificate)
Men category:-
1) First prize: Kemboi Kevin Kiprono (Kenya), Chip Time 01:06:28 (Rs 2,00,000 + Medal + Certificate)
2) Second prize: Nafsena Ejeta Balcha (Ethiopia), Chip Time 01:06:38 (Rs 1,50,000 + Medal + Certificate)
3) Third prize: Clinton Kibet Mutai (Kenya), Chip Time 01:06:39 (Rs 75,000 + Medal + Certificate)