Mizo legendary band pathum — Tribal Power, Dreamhunter leh Albatross — te hi a hrang theuhin an zai leh rimawi kan ngaithla tawh thin. Tun hmaa an hla hit pawh a hla thu en ngai lovin kan zawm dual dual thei ngei ang. Chu erawh chu band mal, a hralh theuh angin a ni ang. Mahse, tun tunah hian hmun khatah, music video pakhatah kan hmu thei dawn.
He Mizo band ropui ber ber pathumte hian, Tribal Power frontman OP-a hla phuah — Isu I hnen ka rawn pan e — tih hla hmangin music video an siam dawn a. Tunah hian recording pawh an peih fel thawkhat tawh a. A video tur hi an buaipui mek e.
Isu I hna ka rawn pan e — music video thar an buaipui turah hian a hla phuahtu OP-a, Dreamhunter vocalist Muanpuia leh Albtaross vocalist ni thin, tun hnua kohhran upa a nih avanga band chawlhsan titih tawh Rintea te an zai dawn a ni. Anni hi kum 50 ral kai thiau tawh an ni.
Band pathuma zaipu-te theuh an zai dawn bakah, band guitarist pathum — Tribal Power guitarist VL-a, Dreamhunter guitarist David Z Hmar leh Albatross guitarist Hmingpuite’n guitar solo an nei theuh bawk dawn.
An music video thar buaipui tur chungchang sawiin Albatross vocalist Rintea chuan, “Kan tlangval tan chhoh a, pu Op-a hla phuah nalh ka tih em em chu — Isu i hnen ka rawn pan e — tih hi a ni a. Kan kum te a lo tam chho ve zel a, inhmuhkhawm mai mai pawh a harsa ve tan tawh. Mahni buaina mual mualah kan buai vek tawh a. Eng chen nge kan zai zel theih dawn kan hre lo va, hun tha Pathianin min pek lai hian Pathian ropui nan ngei, a hla phuahtu Pu Opa kum leh zai lama ka senior bakah, zai lama ka senior pu Muanpuia te min zaipui a, recording neihpuihah ka sawm a. Tin, Tribal Power, Dreamhunter leh Albatross guitarist theuh te guitar solo min neihsak turin ka sawm bawk a, min remtihpuia ka lawm hle,” tiin Thalai Times a hrilh.
Isu i hnen ka rawn pan e — hla hi Venghnuaia H.C. Recording Studio-ah recording an ti a. Music video hi Mawitea, RDS-in a buaipuisak a ni.