Aizawl: Urban Development & Poverty Alleviation Minister K. Sapdanga chuan Inrinni khan minibus-a chuangin a department hnuaia hna thawh lai mek hmun 10 a tlawh.
Minister-in a tlawhte hi Hualngohmuna Construction & Demolition Waste Processing Centre; Hlimen Playground; Mission Veng New Age Multifaceted Urban Centre; Pu Thangfala Colony, Chawnpui bula Storm Drain; Pi K. Sangthuami In, Chawnpui bula Storm Drain; Zotlang Green Cemetery; NH 108, Hunthar bula Storm Drain; Hunthar By-Pass Road; Vaivakawn Thlanmual thar panna Approach Road leh Maumuala internal road leh New Market bula City Centre te a ni.
Minister hian a satu contractor-te kawmin hnathawh kal mek leh hmabak la awmte a zawtfiah a ni.
Hualngohmuna Solid Waste Management Centre hi a tir chuan bawlhhlawh sawngbawlna atana duan ni mah se in sakna atana châk chhia leh in thiahna sawngbawlna hmun, Construction & Demolition Waste Processing Centre atana ruahman a ni ta zawk a. SASCE 2021-22 hnuaia Rs. nuai 1664 senga sak tur a ni a. April 7, 2023 atanga hna tan niin 60% thawh zawh tawh a ni a, kumina zawh beisei a ni.
ASCL hnuaia Hlimen Playground (khelmual) hi Rs. vaibelchhe 10.62 senga sak tur a ni a, April, 2022-a hna tan a ni a, 98% thawh zawh tawh niin February 28, 2026-ah zawh an inbeisei.
ASCL hnuai bawk, Mission Veng-a New Age Multifaceted Urban Centre hi SASCI atanga Rs. vaibelchhe 9.51 senga sak tura duan a ni a, March 17, 2025-ah hna tan a ni a, 10% zawh tawh niin March 16, 2027-a zawh hman beisei a ni.
Pu Thangfala Pawl Building, Chawnpui bula Storm Drain hi Rs. nuai 93.92 senga 180m-a sei, 1.5 x 1.0m-a liana siam tura duan a ni a, hna 30% zawh tawh a ni.
Chawnpui Vengthlang-a K. Sangthuami Building leh MINECO Road inkara Storm Drain hi Rs. nuai 79.70 senna tur niin hna 70% zawhfel a ni tawh a ni.
Zotlang Green Cemetery hi Rs. nuai 485.34 senna tur niin hna 30% zawh tawh a ni.
Hunthara NH108 thlanga Storm Drain hi Rs. nuai 777.16 senna tur niin hna 20% zawh a ni tawh.
Hunthar By-Pass Road hi Hunthar Cemetery atanga Hunthar Middle School inkara tlan tur a ni a, Rs. vaibelchhe 17 senga siam tur niin M/S J&L Associates-te’n hna an thawk.
Vaivakawn Thlanmual thar panna Approach Road leh Maumuala internal road siam hna hi A/E Construction-te’n an chang a, October 22, 2025 atanga tan niin thla 18 chhunga zawh hman tum a ni.
ASCL hnuaia Aizawl New Market, Dawrpuia a City Centre hi Rs. vaibelchhe 41.59 senga sak tur a ni a, October, 2022-a hna tan niin 72% zawh tawh niin December, 2026-ah zawhfel an inbeisei a ni.