Assembly inthlan hmabak, Assam-a Assam Pradesh Congress Committee (APCC) President Gaurav Gogoi leh General Secretary Jitendra Singh te chuan an hruaitu hlun tak pakhatin an party atanga bânna a thehluh hnuah a chenna inah an lenchilh nghal a, hetih lai hian BJP pawhin an lo sawm ve nghal bawk.
Bang ta Bhupen Borah hi Priyanka Gandhi Vadra-i’n February 18 leh 19-a an state a tlawh hma lawkin an party hi a chhuahsan a ni.
Borah-a’n an party a chhuahsan dawn nia rinna hi X-a a nihna (bio) a tar lanah ‘Congress’ tih a telh thin a paih atangin a ni a. A hnuah a bâng tih a sawi chiang zui a, a chhan tak erawh hriat a la ni rih lo.
Borah-a hian a bânna APCC President Gogoi-a hnenah thlenin phek thuma sei lehkha chu Congress party hotu lian hnenah pawh a thlen a, an party-a tel zel châkna a nei tawh lo tih a sawi.
Borah-a’n an party a chhuahsan hi Assam sorkarin Gogoi-a leh a nupui chu Pakistan nena inzawmna neia an puh lai a ni a, inthlang tura an buai em em lai a ni bawk.
Bihpuria atanga vawi hnih MLA atana thlan tlin tawh, Borah-a hi tun hnai kum eng emaw zat chhunga Assam-a Congress-in an hmatheh langsar ber a ni a. A chhuahsan hi an party state unit tan chuan a pawi hle tura ngaih a ni a, inthlan hmabak mai an nih bawk avangin an tan a pawi zual thei.
Hetih lai hian Thawhtanni chawhma lam khan Assam Chief Minister Himanta Biswa Sarma chuan APCC president hlui, Borah-a hi an party-a tel turin a sawm a, BJP chuan atan kawng an hawng tih a sawi.
Sarma hian chanchinbu mite hnenah Borah hian BJP zawm tumin engmah tawngka a la nei lo tih a sawi a. Heti chung hian Thawhlehni tlai hian a chenna inah kawm a tum tih a sawi thung.
“A bâng hi tha ka ti a. Min rawn zawm tur erawh chuan engmah inbiakna kan la nei lo va. Naktuk tlaiah hian a inah ka kal ang a, kum thum liam taah khan Bhupen Borah-a hi kan hnena lo kal tur leh a tan dinna tur bial a awm sa tih kan hrilh tawh,” a ti.
Sarma-a hian na takin Assam Congress chu a bei bawk a, ‘hun khirh takah an ding mek’ tih a sawi.
An party chhunga induhkhawp lohna leh inelna nasa tak awm mek avangin an chhia nia sawiin Congress hruaitu tam tak chu BJP zawm tumin an inbuatsaih mek niin a sawi a. Congress MLA tang lai pali panga velin an zawm thuai dawn niin a sawi bawk.’