The Band Perry, an music tihchhuah hnuhnung ber pawh kum 9 lai ni ve tawh chuan music video thar an rawn chhawpchhuak leh ta e.
An zaitunu Kimberly Perry leh a pasal Johnny Costello te chuan February 13 khan an hla thar ‘Psychological’ chu rawn tichhuakin, thlirtu an ngah nghal hle.
The Band Perry hi Perry leh a unaupa Reid leh Neil te band din niin, kum 2010 phei kha chuan ‘If I Die Young’ hmangin No.1 hit an rawn nei hial a, tunah erawh a unaute hi mahni kawng zawh lama kal tawhin, a pasal nen ‘Band Perry season 2’ tia insawi fiamin, an rawn comeback leh ta a ni.
Kum 42 mi Perry chuan, kum 15 mi lek a nih lai atangin a unaute nen hian band an din tawh thu sawiin, kawng hrang hrangin kan inthlak danglam ve nasa hle, a ti a. Reid hian artist management hna thawk tawhin, Neil-a erawh solo work thawkin a awm mek, a ti bawk.
An rawn let lehna music-ah hian a pasal Costello chuan music instrument hrang hrang hmangin, Perry erawh a zaitunu berah a la tang zel thung. An nupa hian fapa kum 2 mi, Whitaker James an nei tawh bawk a ni.
An hla thar chungchanga an kawmnaah Perry chuan Band Perry season 2 dinna turin musician engkim thiam ka nei thei a, ka lawm hle, tia sawiin, an fapa pawh racing lama a kal daih a nih loh chuan Band Perry season 3 pawh a la awm lovang tih a sawi theih loh, tiin nui chungin a sawi zui a ni.