Aizawl: Lok Sabha MP Richard Vanlalhmangaiha chuan, “Kum khat leh a chanve chhungin cheng vbc. 457, nuai 47, sing riat, sang khat kan pawt chhuak hman,” a ti.
ZPM-in General Headquarters Office-a Thawhtannia chhung inkhawm an neih MP hian kawng hrang hranga sorkar laipuia an hlawhtlinna a sawi.
“ZPM kan vanduaina chu, kan sorkar laia opposition-te hi constructive opposition ni lovin destructive opposition an ni a, kan thil tih that an hmu thei miah lo va, chu pawh dawt hmangin a ni a, rei lo tea hai lan a ni leh zel thin a ni,” a ti.
Mizoram Universal Healh Care Scheme (MUHCS) tha a tih thu sawiin a la zawm lote pawh zawm vek turin a sawi.
‘ZPM sorkar hnuah pawisa a vang’ tia sawi awm chu sawi fiahin, “Kum 2047 hian India hian kum 100 a tling dawn a, sorkar laipuiin developed country-ah min hlan kai a tum a. Sorkar a inbuatsaih nasa a, nakinah phei chuan Vikshit Bhrarat hi an la sawi nasa tulh tulh dawn a, he policy hian ram pum a huam a. Chu policy-a an kalpui thil pakhat chu ‘cashless’ hi a ni. Tute emawin, ‘ZPM sawrkar hnuah pawisa a vang,’ an ti a, ZPM sorkar vang a ni lo, hei chu central policy a ni,” a ti.
Cashless hi an kalpui zel dawn a, kum 2047 hmaa pawisa note zawng zawng hi tihbo vek an tum niin a sawi bawk.
ZPM chhung inkhawm hi Er. Vanlalneiha Ralte, Consultant, ZPM Gen. Hqrs-in a kaihruai.
- MP-in a hlawhtlinna a sawite
(i) Nikum khan Post-Matric Scholarship vbc 50, nuai 42, sing nga, sang khat kan pawt chhuak.
(ii) NH 44, hmana tender tawh, hmana thawh daih tawh chu, a hna thawktuin a thawk chhe lutuk a, an cancel tawp mai a, chuta pawisa bang la awm chu Rs. vbc. 170 leh nuai 96 a ni.
(iii) ‘One Time Improvement’ NH 44 tho hi vbc. 48 leh nuai 63 a ni a.
Performance Based Maintenance Contract (PBMC), Bairabi atanga Bilkhawthlir inkar chu Rs. vbc. 38, nuai 73 a ni.
(iv) PBMC tho, Lawngtlai to Zochachhuah chu vbc. 109, nuai 93 a ni.
(v) PBMC bawk, Champhai leh Zokhawthar inkar chu vbc. 28, nuai 95 a ni.
(vi) One Time Improvement, Champhai leh Zokhawthar inkar, NH 6 chu vbc 9, nuai 85 a ni.