Aizawl: Mizo Students’ Union (MSU) chuan Mizoram budget 2026-27 pharh mai turah college zirlaite Study Tour Fund-ah Rs. nuai 150 dah an duh.
MSU General Headquarters, Aizawl hruaitute chuan Thawhtanni khan an thil duh hi party hrang hrangte hnenah budget session lo awm tura thlawp tura an ngenna chu an thehlut.
An thuchhuahin a tar lan dan chuan study tour fund-ah hian budget-ah Rs. nuai 50 dah chu Rs. nuai 150-a tipung turin sorkar an lo ngen tawh thin a, chief minister hnenah pawh February 7, 2025 khan an lo thlen tawh.
Thawhlehni atanga budget session tan turah Rs. nuai 100-ah tipung turin chhawpchhuah a ni dawn tih sawiin an lawm viau rualin Mizoram sorkar college-ah zirlai 13,553 an awm tawh a, zirlai pakhatin Rs. 737 bak an la chan theih dawn loh avangin an dinna chu Rs. nuai 150 a ni tih hriaa party anga thlawpna an ngen a ni.
Party tin hnena lehkha an thehluhnaah hian MSU hruaitute hi ZPM Party aiawhin VL Zaithanzama, MLA-in a dawng a, MNF Party aiawhin Vanlalzawma, Vice President-in a dawng. Congress aiawhin Lal Thanzara, President leh BJP aiawhin President Dr. K.Beichhua ten an dawnsawng tih an sawi.