Mizoram Universal Health Care Scheme (MUHCS) kalpui meka sorkar kum kal mekah dan siama pawisa pek chhuah hun tur bituk aia hmain pek chhuah a ni a, chawlhkar khat chhungin tihfel zel a ni.
MUHCS-a bill pek chungchang hi Thawhtannia Chief Minister Lalduhoma hova CM Conference ZHall-a MUCHS thuneitu sang, Governing Body thutkhawmah tar lan a ni.
“‘Sorkar hian empanelled hospital-te hnenah ni 30 chhungin bill a pe chhuak thin ang’ tia dan siam a nih laiin sum leh pai dinhmun a that avangin kar tin pawisa hi an pe chhuak thin zawk a; chuvangin, empanelled hospital-te tan harsatna engmah a awm rih lova ngaih a ni,” tiin thutkhawmah hian tar lan a ni.
Kum kal mek MUHCS atana Rs. vaibelchhe 154 vel sum hmuh tawh niin hmuh tur Rs. vaibelchhe 48 vel a la awm nia tar lan a ni a. Damlo 83,682-te bill Rs. vaibelchhe 126 vel pek a ni tawh a, endik tur Rs. vaibelchhe 38 vel la awm pawh endik thuai a ni dawn.
MUHCS-ah hian chhungkaw 20,198-a mi 80, 792, pensioner chhungkaw 10,236-a mi 40,944, sorkar hnathawk chhungkaw 35,325-a mi 1,41,300 leh AB PMJAY chhungkaw 2,22,943-a mi 8,91,772, a vaiin chhungkaw 2,88,702-a mi 11,54,808 an inziak lut.
Kum kal mekah chhungkaw inziak lut atanga 29%-in bill an thehlut a, mihring inziak lut zinga 7% an ni a. Mi pakhat hnena bill pek zat chawhrualin chu Rs. 15,106 a ni.
MUHCS kalpui hnuah sorkar damdawi in pantu pung nasain bill endik tawh 70% pawh sorkar damdawi ina lut a ni a. Sorkar damdawi ina lut tam zawk mah se an bill erawh chu pawm tawh atanga 39% chauh a ni thung a. “Mi mal damdawi in pantute bill a san bik chhan hi natna serious bik – thluak zai, thin thlak leh kal thlak ang chite an nih thin vang a ni tlangpui a. Hei vang hian sorkar damdawi inte thuam chak zel a tul hle ngaih a ni,” tiin sorkar thuchhuah chuan a tar lang.
Governing Board chuan sorkar damdawi in leh empanelled hospital-a enkawl theih natnate chu a theih chin chinah non-empanelled private hospital-a refer loh ni se an ti a. Non-empanelled hospital-a enkawl tura refer theihna dan, emergency/life threatening situation pawh a natna kalpui theih chin chiang lehzuala sawifiah a ni ang.
MUHCS hi sorkar tangka kum mila kalpui a ni a, kum thar atanga chak zawka kalpui a nih theih nan thukhawm hian ruahmanna an siam a. Committee tihtlem pawh tha an tih angin core committee chu tihbo tur a ni a. A kalphung tur dangte pawh siam rem hlek hlek a ni a. Heng zingah chuan damdawi man tlawma lei theihna tur, Pharma Depot din tura hmalak leh subscription-a double beneficiary awm palh thei laka invenna siam te a tel.
Thutkhawmah hian chairman, chief minister chuan Health Minister Lalrinpuii leh MUHCS-a thawktute chungah lawmthu a sawi a. An thawhrimna leh remhriatna zarah sorkar a hmingtha a, “Kan scheme chhawrtu mipuite an lawm em em a ni,” a ti.
Meeting-ah hian health minister, Adviser to CM TBC Lalvenchhunga leh governing body member dangte an tel.