Aizawl: Nilainia Salachhuah, Myanmar-a bungraw dah tura kal, Pathiannia a ruang hmuh tak, Lalramsanga, AOC Veng, Lawngtlai thihna chungchanga hmalaknate chu Lawngtlai Bawrhsap Donny Lalruatsanga, Lawngtlai Superintendent of Police PC Lalchunglura leh CYLA President F. Lalrothanga ten an sawi fiah.
Thawhtannia thuthar lakhawmtute an kawmnaah hian Donny Lalruatsanga chuan hmalakna kawng hrang hrang kalpui mek a ni tih a sawi a, thil sual titute chu ‘foreigner’ ni mah se hremna pek ngei an nih theihna tura hmalak a nih tur thu a sawi.
“Lalramsanga leh a thiante hi Nilaini khan Salachhuaha bungraw dah tura kalin a tuk zan dar 09:00 atangin a chanchin hriat tur awm loin tun dinhmun hi kan thleng ta a ni,” a ti.
Bawrhsap chuan CYLA, MTP leh LDPA te nen thawhhona tha tak awmin district thuneitute nen pawh inrawn reng a nih thu a sawi a. Thupek khauh zawk chhuah a nih tur thu tar langin thla hnih chhung atan ramri khar a nih tur thu a sawi a. Lawngtlai mipuite chiai lo tura chahin, chak taka hmalak zel a nih tur thu a sawi bawk.
SP PC Lalchunglura chuan Lalramsanga ruang hi Pathianni chawhnu dar 03:00 velah Salachhuah leh Chhimtuipui infinnaah hmuh a nih thu a sawi a. “Thubuai ziah luh tawh niin Phura Police station-ah transfer leh a ni ang” a ti a. CYLA leh MTP te nen thawhhona tha tak a awm tih sawiin pawi khawihtute chhuichhuaha hremna pe tura hmalak tum a nih thu a sawi bawk.
CYLA president chuan MTP General Headquarters nen thukhawmin Lalramsanga a bo tih hriat atang khan a zawn hna thawh nghal niin Arakan Army nen pawh an inbiak thu a sawi Hmalak zel a nih tur thu sawiin district thuneitute hmalakna an thlawp tlat thu a sawi bawk.