New Zealand-a North Island hmun zau tak chu ruah tam tak leh thli chak tak tleh avangin thlawhna, rel leh lawng hmanga inkalpawhna a buai hle a, kawngpui tam tak khar a ni a, mi sang telin power an neih loh phah bawk.
Tual chhung chanchinbute chuan an khawpui, Wellington tumhmunah bik chuan Thawhtanni chawhnu atang khan thlawhna a thlawk leh thei tawh a, hmun dangah erawh thulh leh tihkhawtlai a la tam hle niin an tar lang.
Air New Zealand chuan Wellington, Napier leh Palmerston North-a chawhma lam thlenga an buai hnuah Thawhtanni zan atang kha chuan a pangngaia an kal leh theih tan dawn tih an sawi.
Online-a thlalak darhah chuan khaw tam tak chu tui lianin a chim a, inte pawh a chim a, thing tluin lirthei a delh leh kawng min a tam hle.
Wellington hmar lam km 160 chuanga hla, Bunnythorpe-a cheng nu pakhat chuan an khaw awm dan chu ‘a rapthlak hle’ tih New Zealand Herald chanchinbu a hrilh.
Hmun 30,000 chuangin power an nei lo va, heng zinga 10,000 chuang hi Wellington-a cheng an ni tih thuneituten an sawi a. Kawngpuiah lirthei tam tak a tangkhang a, sikul pawh khar a ni.
Ruah leh thli hian South Island panin Thawhlehniah hian a thawk ve dawn niin an sawi lawk a, harsatna pawh a thlen veleh ngei rin a ni.
North Island hmar lama thli leh ruah insiam hian kartawp atang khan mi a tibuai tawh a. Ruah a tamin thli pawh a na hle a. Inrinni khan kawngpuia a lirthei tuiin a len avanga thi ruang pakhat chhar a ni.
Thla hmasa khan North Island hmar lam vaukam, Mouth Maunganui-a ruah nasa tak sur avanga lei nasa tak minah mi paruk an lo thi tawh bawk.