Brazilian forward Neymar chuan an ram team tana khelh a phu tih a pho lang leh ta a, a hliam zai a nih hnua a match hmasa berah assist a nei lehnghal – nimin khan AE Velo Clube chu 6-0-in an sawp.
Thawhtanni tuk khan Sao Paulo state league Campeonato Paulista inkhelah, second half-ah bench atangin Neymar hi luhtir a ni a, minute 78-naah Velo Clube defender Islan chuan tlu chungin a lo tlawh a; mahse, Neymar a hliam na lo hlauh.
Brazil captain hlui hian a hnu lawkah Gabriel Barbosa goal khung tur a siamsak a, a dam leh ta tih khelmualah a pho lang.
Kum 34 mi hian January, 2025 khan Saudi Pro League club Al Hilal chhuahsanin, a bul tanna, Santos-ah a kir a; mahse, malpui hliam vangin a hun tam zawka talbuai.
Nikum tawp lamah pawh khup hliam vangin a buai a; mahse, a khup hliam hi zai lawk duh loa inkhel luiin, Brazilian Serie A atanga tla thei dinhmuna ding hman Santos a chhanhim.
Neymar hian Santos a kir hnuah inelna hrang hrangah match 29 khelin goal 11 a khungsak a, mi dang thun tur vawi nga a siamsak a, a hliam neih dan nena ngaihtuah chuan a tichhe lo hle.
December 22 khan a khup hliam a zai zui a, a inenkawl reng hnuah nimin inkhel hi a lo kir lehna hmasa ber a ni a. Gabriel Barbosa (2 goals), Moisés, Thaciano, Gabriel Menino leh Benjamín Rollheiser goal hmangin an chak.
Santos head coach Juan Pablo Vojvoda chuan Neymar chu World Cup-a Brazil tana inlan tura a la ṭhat tawk thu sawiin, “Neymar hi chu kan mamawh tlang vek a ni ber mai. Santos-in kan mamawh a, national team pawh hian an mamawh a ni.
“A khelh that chuan Ancelotti pawh a hlim ang tih ka hria a, ani hi chu world class player a ni a. Hlawhtlin duhin a la tuihal reng a, match tinah, training tinah chu chu ka la hmu reng a, chu chuan a nawr kal reng a ni,” a ti.
Neymar hian Brazil tan match 128 khelin goal 79 a khung a, ram tana goal khung hnem ber a ni a; mahse, October, 2023 khan Uruguay laka 2-0 a an tlawm ṭumin khup hliam a nei a, hemi hnu hian ram tan koh a ni leh tawh lo.
Brazil coach Carlo Ancelotti chuan World Cup khel tura a inpeih phawt chuan Neymar koh a hnial loh thu a sawi.