Aizawl: Prof. Lalnilawma, Minister, Rural Development & Administration Department chuan Thawhlehni khan MINECO-a Open Gym bulah Mizoram State Rural Livelihoods Mission (MzSRLM) leh RD&AD-te buatsaih, RD Block 12 (Lungsen, Aibawk, Khawbung, Tlangnuam, Lunglei, Kawrtethawveng, Zawlnuam, East Lungdar, Sangau, Thingsulthliah, Reiek leh West Phaileng)-a Self Help Group (SHG) member-te hman tur, MzSRLM scheme enkawl pakhat, Aajeevika Grameen Yojana Express (AGEY) hnuaia lirthei 19 (Mahindra Pik Up 17 leh Maruti Super Carry pahnih) hlanna leh vai liamna hun a hmanpui.
Prof. Lalnilawma chuan a hun tawn tawh zinga lawmawm ber pawl a nih thu sawiin hetiang ti thei dinhmuna an awm chu ropui a ti a MzSRLM tan tirh hunlai a mitthlaah a awm thu a sawi.
Minister chuan department hmalaknate tar langin, Ropuiliani Women Farmer Producer Company kaltlangin SHG thil thar chhuahte phaiah an thawn a, hralhna tur an zawng zel tih a sawi a. prime minister-in a ngaih pawimawh em em, ‘Lakhpati Didi’ ni thei tura kum khata nuai 1 tal la lut turin nuho chet chhuah a ngaih thu a sawi.
Prof. Lalnilawma chuan SHG member lirthei dawngte chu an mawhphurhna a san thu hrilhin, a rulh dan tur ngaihtuah tel a, an lirthei dawnte uluk taka enkawla insurance leh pollution test-te a hun taka tifel turin a chah
AGEY lirthei vai liamna hun hi R. Zarzosanga, State Mission Director, MzSRLM/Commissioner & Secretary, RD&AD-in kaihruaiin Zosangzuali Pachuau, CEO, MzSRLM-in lirthei semchhuah leh AGEY hnuaia hmalaknate report a pe.
Kum 2017–18 khan MzSRLM chuan AGEY hnuaiah block 12 hnenah lirthei 48 a lo pe chhuak tawh a ni tih a tar lang.
AGEY hi August, 2017 atanga hman tan niin, DAY-NRLM hnuaia sub-scheme a ni a. A tum ber chu thingtlanga awm SHG member-te sum lakluhna hmanrua tur, khaw mipuiten bazar, zirna in, leh damdawi in kalna atana hman tur leh khaw chhehvel ei leh bar hmasawnna thlen thei tur lirthei ruahmansak a ni a. He programme hnuaiah hian MzSRLM atangin Cluster Level Federation (CLF)-te hnenah AGEY atana hman tur sum pek niin pung awm lovin SHG member-te hian lirthei lei nan pukin kum ruk chhungin an rul zo leh tur a ni.